2 കി.മീ നീളം, 126 കോച്ചുകൾ, 4 എന്ജിൻ: അനാക്കോണ്ട ട്രെയിൻ
നാല് എൻജിനുകള്, മൂന്നു ഗാർഡ് റൂമുകള്, 126 കോച്ചുകൾ, ആകെ നീളം ഏകദേശം രണ്ടു കിലോമീറ്റര്. ചരിത്രത്തിലേക്ക് ഓടിച്ചു കയറിയിരിക്കുകയാണ് ഈറോഡിൽ നിന്ന് പുത്തൂരിലേയ്ക്കുള്ള ദക്ഷിണ റെയിൽവേയുടെ ഈ ഗുഡ്സ് ട്രെയിൻ യാത്ര. മൂന്നു ട്രെയിനുകൾ കൂട്ടിച്ചേർത്ത് ബുധനാഴ്ച രാവിലെ 6.50നു തുടങ്ങിയ പരീക്ഷണ യാത്ര ഉച്ചയ്ക്ക് 1.30 ഓടെ ജോലാർപേട്ടയിലും 6.50 ന് ഈറോഡിലുമെത്തി.
മുമ്പിലത്തെ ട്രെയിനിൽ രണ്ട് എൻജിനുകളും ബാക്കി രണ്ടു ട്രെയിനുകളിൽ ഓരോ എൻജിനുമായിരുന്നു ഉണ്ടായിരുന്നത്. 42 കോച്ചുകള് വീതമുള്ള 3 ട്രെയിനുകളാണ് ഒരുമിച്ച് ചേർത്തത്, ബോഗികളെല്ലാം കാലിയായിരുന്നു. ഒാരോ ട്രെയിനിലും ഒരു ലോക്കൊപൈലറ്റും ഒരു ഗാർഡും ഉണ്ടായിരുന്നു. ദക്ഷിണ റെയില്വേ ആദ്യമായാണ് ഇത്തരത്തിൽ പരീക്ഷണയോട്ടം നടത്തുന്നത്. ലോക്ഡൗണ് ആയതുകൊണ്ട് മറ്റു ട്രെയിനുകള് ഇല്ലാതിരുന്നത് സുഗമമായി പരീക്ഷണം നടത്താന് സഹായിച്ചെന്നും ഭാവിയിൽ ട്രാക്കിന്റെ ലഭ്യത അനുസരിച്ച് ഇത്തരത്തിലുള്ള ഓട്ടങ്ങൾ നടത്തുമെന്നും ദക്ഷിണ റെയിൽവേ അറിയിച്ചു. നേരത്തെ ഈസ്റ്റ് കോസ്റ്റ് റെയിൽവേ 147 വാഗണുകളോടു കൂടിയ ട്രെയിനിന്റെയും 177 വാഗണുകളോടു കൂടിയ ട്രെയിനിന്റെയും പരീക്ഷണയോട്ടം നടത്തിയിട്ടുണ്ട്.