തൃശ്ശൂർ ജില്ലയിലെ ജല്‍ ശിക്ഷാ അഭിയാന്‍ പദ്ധതികള്‍ കേന്ദ്രസംഘം സന്ദര്‍ശിച്ചു
തൃശ്ശൂർ ജില്ലയിലെ ജലസംരക്ഷണ പ്രവര്‍ത്തനങ്ങള്‍ക്ക് അഭിനന്ദനം
തൃശ്ശൂർ ജില്ലയിലെ നൂതന ജലസംരക്ഷണ പ്രവര്‍ത്തനങ്ങള്‍ക്ക് കേന്ദ്രസംഘത്തിന്റെ അഭിനന്ദനം. ജല്‍ ശിക്ഷാ അഭിയാന്റെ ക്യാച്ച് ദി റെയ്ന്‍ (catch the rain) കാമ്പയിന്‍ പ്രവര്‍ത്തനങ്ങള്‍ വിലയിരുത്തുന്നതിനായി ജില്ലയിലെത്തിയ കേന്ദ്ര ഉപഭോക്തൃ കാര്യ, ഭക്ഷ്യ പൊതുവിതരണ മന്ത്രാലയം ഡയറക്ടര്‍ വിവേക് ശുക്ലയുടെ നേതൃത്വത്തിലുള്ള സംഘമാണ് ജില്ലയില്‍ നടക്കുന്ന ജല സംരക്ഷണ പദ്ധതികളെ അഭിനന്ദിച്ചത്.
അമിത ജല ചൂഷണ ബ്ലോക്കുകളെ സുരക്ഷിത ബ്ലോക്കുകളാക്കി മാറ്റുന്നതില്‍ ജില്ലയില്‍ നടപ്പിലാക്കിയ ജല സംരക്ഷണ പ്രവര്‍ത്തനങ്ങള്‍ നിര്‍ണ്ണായക പങ്ക് വഹിച്ചതായി കേന്ദ്രസംഘം വിലയിരുത്തി. കലക്ടറേറ്റില്‍ ആരംഭിച്ച ജല്‍ ശക്തി കേന്ദ്രത്തിന്റെ പ്രവര്‍ത്തനങ്ങളിലും സംഘം തൃപ്തി രേഖപ്പെടുത്തി. കുളങ്ങള്‍ നവീകരിച്ച് കുടിവെള്ളത്തിനും ജലസേചനത്തിനും ഉപയോഗിക്കുന്ന രീതി പ്രത്യേകം അഭിനന്ദനം അര്‍ഹിക്കുന്നതാണ്. ജില്ലയില്‍ നടപ്പിലാക്കി ക്കൊണ്ടിരിക്കുന്ന വിവിധ ജലസംരക്ഷണ പദ്ധതികള്‍ വിലയിരുത്തിയ സംഘം അവയെ കുറിച്ച് മികച്ച അഭിപ്രായവും രേഖപ്പെടുത്തി. കേന്ദ്ര ജല- ഊര്‍ജ ഗവേഷണ കേന്ദ്രം ശാസ്ത്രജ്ഞന്‍ കേശവ് ബോബഡേയും കേന്ദ്ര സംഘത്തില്‍ ഉണ്ടായിരുന്നു.
സന്ദര്‍ശനത്തിന് എത്തിയ കേന്ദ്ര സംഘത്തെ ജില്ലാ കലക്ടര്‍ ഹരിത വി കുമാറിന്റെ നേതൃത്വത്തില്‍ കലക്ടറേറ്റില്‍ സ്വീകരിച്ചു. കലക്ടറേറ്റിലെ ജല്‍ ശക്തി കേന്ദ്രം സന്ദര്‍ശിച്ച സംഘത്തെ ജില്ലയില്‍ നടക്കുന്ന ജല്‍ ശക്തി അഭിയാന്‍ പദ്ധതി പ്രവര്‍ത്തനങ്ങള്‍ സംബന്ധിച്ച് ജില്ലാ കലക്ടര്‍ ധരിപ്പിച്ചു.
തെക്കുംകര ഗ്രാമപഞ്ചായത്തിലെ വട്ടായി കുടിവെള്ള പദ്ധതി, പൂമല പി എച്ച് സിയിലെ തുറന്ന കിണര്‍ റീചാര്‍ജ്ജിംഗ് സംവിധാനം, അവണൂര്‍ ഗ്രാമപഞ്ചായത്തിലെ കുണ്ടന്‍തോട് പുനരുദ്ധാരണ പ്രദേശം എന്നിവയും കേന്ദ്ര സംഘം സന്ദര്‍ശിച്ചു. 2000 കുടുംബങ്ങള്‍ക്ക് ഒരു വര്‍ഷം മുഴുവന്‍ കുടിവെള്ളം എത്തിക്കുന്ന പഞ്ചായത്തിന്റെ വട്ടായി കുടിവെള്ള പദ്ധതിയും സംഘത്തിന്റെ പ്രത്യേക പ്രശംസയ്ക്ക് അര്‍ഹമായി.
ചേലക്കര ഗ്രാമപഞ്ചായത്തിലെ അമൃതസരോവര്‍ പദ്ധതിയുടെ ഭാഗമായി ഗാന്ധി ഗ്രാമീണ തൊഴിലുറപ്പ് പദ്ധതിയില്‍ ഉള്‍പ്പെടുത്തി നവീകരിക്കുന്ന അയ്യപ്പന്‍ കുളം, എരുപുറം കുളം എന്നിവ സംഘം സന്ദര്‍ശിച്ചു. തൊഴിലുറപ്പ് പദ്ധതിയില്‍ പണി പൂര്‍ത്തീകരിച്ച വാറ്റുകുളം, കോരന്‍ കുളം എന്നിവയും സംഘം സന്ദര്‍ശിച്ചു. അയ്യപ്പന്‍ കുളത്തില്‍ തൊഴിലുറപ്പ് തൊഴിലാളികള്‍ക്ക് ഒപ്പം സംഘടിപ്പിച്ച ജലസഭയും ശ്രദ്ധേയമായി.
ജല സംരക്ഷണ പ്രവര്‍ത്തനങ്ങളുമായി ബന്ധപ്പെട്ട് ജോലി ചെയ്യുന്ന തൊഴിലുറപ്പ് പ്രവര്‍ത്തകരുമായി സംഘം ആശയവിനിമയം നടത്തി. ചേലക്കര ഗ്രാമപഞ്ചായത്ത് പ്രസിഡന്റ്, എം കെ പത്മജ, വൈസ് പ്രസിഡന്റ് ഷലീല്‍, തൊഴിലുറപ്പ് ജോയിന്റ് പ്രോഗ്രാം കോര്‍ഡിനേറ്റര്‍ എം കെ ഉഷ, പഴയന്നൂര്‍ ബ്ലോക്ക് ഡെവലപ്പ്‌മെന്റ് ഓഫീസര്‍ ഗണേഷ്, ഭൂജലവകുപ്പ് ജില്ലാ ഓഫീസര്‍ എ എസ് സുധീര്‍ എന്നിവര്‍ സംഘത്തെ അനുഗമിച്ചു.
Related News
തൃശൂരിൽ കണ്ടക്ടർ ബസിൽനിന്ന് തള്ളിയിട്ട യാത്രക്കാരൻ മരിച്ചു
പഞ്ചാബ് കിങ്സിനു ചെന്നൈയ്ക്കെതിരെ അനായാസ വിജയം
7 ദിവസം സാവകാശം വേണം’: പീഡന പരാതിയിൽ ആദ്യമായി പ്രതികരിച്ച് പ്രജ്വൽ
മോഷ്ടിച്ച പണം കൊണ്ട് കിക്ക് ബോക്സിംഗ് പരിശീലനം,പെണ്‍സുഹൃത്തുക്കളുമായി കറക്കം; ജിമ്മൻ കിച്ചു പിടിയിൽ
മേയർ- ഡ്രൈവർ തർക്കം: മെമ്മറി കാർഡ് കാണാതായ സംഭവത്തിൽ കേസെടുത്തു