സാത്വിക്- ചിരാ​ഗ് സഖ്യത്തിന് ഖേൽരത്ന; ഷമിക്കും ശ്രീശങ്കറിനും വൈശാലിക്കും അർജുന; 5 പേർക്ക് ദ്രോണാചാര്യ; അർജുന 26 പേർക്ക്

News Desk

20 December 2023 06:05 PM

രാജ്യത്തിന്റെ യശസുയർത്തിയ താരങ്ങൾക്ക് രാഷ്‌ട്രത്തിന്റെ ആദരം, 2023ലെ ദേശീയ കായിക പുരസ്കാരങ്ങൾ പ്രഖ്യാപിച്ചു. ബാഡ്മിന്റണിലെ ഒന്നാം നമ്പർ ജോഡിയായ സാത്വിക് സായിരാജ്- ചിരാ​ഗ് ഷെട്ടി സഖ്യത്തിന് മേജർ ധ്യാൻ ചന്ദ് ഖേൽരത്ന പുരസ്കാരം. ബാഡ്മിന്റണിലെ സംഭാവനങ്ങൾ പരി​ഗണിച്ചാണ് പുരസ്കാരം നൽകുന്നത്. ഏകദിന ലോകകപ്പിൽ മികച്ച പ്രകടനം പുറത്തെടുത്ത മുഹമ്മദ് ഷമിക്ക് അർജുന അവാർഡ് നൽകും.

ക്രിക്കറ്റിന് നൽകിയ സംഭാവനകൾ മാനിച്ചാണ് പുരസ്കാരം.മലയാളി ലോം​ഗ് ജമ്പ് താരം എം ശ്രീശങ്കറിനും അർജുന പുരസ്കാരമുണ്ട്.ചെസ് താരം പ്രജ്ഞാനന്ദയുടെ സഹോദരിയും ​ഗ്രാന്റ് മാസ്റ്ററുമായ ആർ വൈശാലിയും അർജുന പുരസ്കാരം നേടി.

ഷമിക്ക് പുറമെ 25 പേർക്കും അർജുന പുരസ്കാരമുണ്ട്. മലയാളി പരിശീലകന്‍ ഇ. ഭാസ്‌കരൻ, പ്രജ്ഞാനന്ദയുടെ പരിശീലകൻ ആർ.ബി രമേഷ് ബാബു അടക്കം അഞ്ചുപേർക്ക് ദ്രോണാചാര്യ പുരസ്കാരവും പ്രഖ്യാപിച്ചിട്ടുണ്ട്. ജനുവരി ഒൻപതിന് രാഷ്‌ട്രപതി ഭവനിൽ പുരസ്കാരങ്ങൾ നൽകും.

അര്‍ജുന അവാര്‍ഡ് പട്ടിക: ഓജസ് പ്രവീണ്‍, ആതിഥി ഗോപിചന്ദ് (അമ്പെയ്ത്ത്), എം. ശ്രീശങ്കര്‍ (അത്‌ലറ്റിക്‌സ്), പാറുല്‍ ചൗധരി, മുഹമ്മദ് ഹുസാമുദ്ദീന്‍ (ബോക്സിങ്), ആര്‍. വൈശാലി (ചെസ്), മുഹമ്മദ് ഷമി (ക്രിക്കറ്റ്), അനുഷ് അഗര്‍വാല (അശ്വാഭ്യാസം), ദിവ്യകൃതി സിങ് (അശ്വാഭ്യാസം), ദീക്ഷ ദാഗര്‍ (ഗോള്‍ഫ്), കൃഷന്‍ബഹദൂര്‍ പഥക് (ഹോക്കി), പുക്രംബം സുശീല ചാനു (ഹോക്കി), പവന്‍ കുമാര്‍ (കബഡി), റിതു നേഗി (കബഡി), നസ്രീന്‍ (ഖോ-ഖോ), പിങ്കി (ലോണ്‍ ബോള്‍സ്), ഐശ്വരി പ്രതാപ് സിങ് തോമര്‍ (ഷൂട്ടിങ്, ഇഷ സിങ് (ഷൂട്ടിങ്), ഹരീന്ദര്‍ പാല്‍ സിങ് (സ്‌ക്വാഷ്), ഐഹിക മുഖര്‍ജി (ടേബിള്‍ ടെന്നീസ്), സുനില്‍ കുമാര്‍ (ഗുസ്തി), അന്തിം പംഗല്‍ (ഗുസ്തി), നോറെം റോഷിബിന ദേവി (വൂഷു), ശീതള്‍ ദേവി (പാരാ അമ്പെയ്ത്ത്), ഇല്ലൂരി അജയ് കുമാര്‍ റെഡ്ഡി (അന്ധ ക്രിക്കറ്റ്), പ്രാചി യാദവ് (പാരാ കനോയിങ്).