ഒരേയൊരു രാജാവ്; കിംഗ് കോഹ്ലിക്ക് 50ാം ഏകദിന സെഞ്ച്വറി
ഏകദിന ലോകകപ്പില് ന്യൂസീലന്ഡിനെതിരായ സെമി ഫൈനലിലൂടെ ചരിത്ര റെക്കോഡില് വിരാട് കോലി. മുംബൈയില് സച്ചിന് ടെണ്ടുല്ക്കറെ സാക്ഷിയാക്കി സച്ചിന്റെ ഏകദിന സെഞ്ച്വറി റെക്കോഡിനെയും ഒരു ലോകക്കപ്പിൽ ഏറ്റവും കൂടുതൽ റൺസ് എന്ന റെക്കോർഡും കോലി മറികടന്നിരിക്കുകയാണ്.
സച്ചിന്റെ തട്ടകമായ മുംബൈയില് 50ാം ഏകദിന സെഞ്ച്വറി പൂര്ത്തിയാക്കിയ കോലി ആരും തകര്ക്കില്ലെന്ന് കരുതിയ സച്ചിന്റെ റെക്കോഡാണ് മറികടന്നിരിക്കുന്നത്. അതും നോക്കൗട്ട് മത്സരത്തിലാണെന്നതാണ് എടുത്തു പറയേണ്ടത്.
ഈ ലോകകപ്പിലെ മൂന്നാം സെഞ്ചുറിയാണ് കോലി പൂർത്തിയാക്കിയത്. ബംഗ്ലാദേശിനും ദക്ഷിണാഫ്രിക്കക്കുമെതിരെയായിരുന്നു മറ്റ് രണ്ട് സെഞ്ചുറികൾ. ഒരു ലോകകപ്പിൽ ഏറ്റവും കൂടുതൽ റൺസ് നേടുന്ന താരമെന്ന സച്ചിന്റെ റെക്കോർഡും കോഹ്ലി മറികടന്നു. 2003 ലോകകപ്പിൽ സച്ചിന്റെ 673 റൺസെന്ന റെക്കോർഡാണ് മറികടന്നത്. ലോകകപ്പ് നോക്കൗട്ടിൽ സെഞ്ചുറി നേടുന്ന രണ്ടാമത്തെ ഇന്ത്യൻ താരവും കോലിതന്നെ. 2003 ലോകകപ്പിൽ സൗരവ് ഗാംഗുലി മാത്രമാണ് ഇന്ത്യക്കായി മുൻപ് നോക്കൗട്ടിൽ സെഞ്ചുറി നേടിയിട്ടുള്ളത്. മത്സരത്തിൽ ഇന്ത്യ 325 ന് 1 എന്ന നിലയിലാണ്. രോഹിത് ശർമ്മയാണ് പുറത്തായത്. ശുഭ്മൻ ഗിൽ 79 (65) അർധസെഞ്ചുറി നേടിയശേഷം പരിക്കേറ്റ് പുറത്തുപോകുകയായിരുന്നു.