ശ്രീലങ്കയ്ക്ക് ആദ്യ ജയം; നെതർലൻഡ്സിനെ 5 വിക്കറ്റിനു തോൽപ്പിച്ചു
ഏകദിന ലോകകപ്പില് നെതർലൻഡ്സിനെതിരായ മത്സരത്തിൽ ശ്രീലങ്കയ്ക്ക് 5 വിക്കറ്റ് ജയം. നെതർലൻഡ്സ് ഉയര്ത്തിയ 263 റൺസ് വിജയലക്ഷ്യം ശ്രീലങ്ക 49.4 ഓവറിൽ 5 വിക്കറ്റ് നഷ്ടത്തിൽ മറികടന്നു. ഓപ്പണർ പാതും നിസ്സങ്കയും (54) സധീര സമരവിക്രമയും (91*) അർധ സെഞ്ചറി നേടി. ഇത്തവണത്തെ ലോകകപ്പിൽ ശ്രീലങ്കയുടെ ആദ്യ ജയമാണിത്. സ്കോർ നെതർലൻഡ്സ് 49.4 ഓവറിൽ 262ന് പുറത്ത്. ശ്രീലങ്ക 49.4 ഓവറിൽ 5ന് 263.
മറുപടി ബാറ്റിങ്ങിനിറങ്ങിയ ശ്രീലങ്കയ്ക്ക് സ്കോര് 18ൽ നിൽക്കേ ആദ്യ വിക്കറ്റ് നഷ്ടമായി. 5 റൺസുമായി ഓപ്പണർ കുശാൽ പെരേര മടങ്ങി. 11 റൺസെടുത്ത കുശാൽ മെന്ഡിസും വൈകാതെ കൂടാരം കയറി. സ്കോർ 104ൽ നിൽക്കേ നിസ്സങ്ക പുറത്തായി. നാലാം വിക്കറ്റിൽ ചരിത് അസലങ്കയെ കൂട്ടുപിടിച്ച് സമരവിക്രമ 77 റണ്സിന്റെ പാർട്നർഷിപ്പ് പടുത്തുയർത്തി.
33–ാം ഓവറിൽ, 66 പന്തിൽ 44 റൺസ് നേടിയ അസലങ്ക ആര്യൻ ദത്തിന്റെ പന്തിൽ ക്ലീൻ ബോൾഡായി. സ്കോർ 257ൽ നിൽക്കേ ധനഞ്ജയ ഡിസിൽവയും (37 പന്തിൽ 30) പുറത്തായി. 91 റൺസുമായി പുറത്താകാതെ നിന്ന സമരവിക്രമ, 49–ാം ഓവറിൽ ടീമിനെ വിജയത്തിലെത്തിച്ചു. 107 പന്തിൽ 7 ഫോർ ഉൾപ്പെടുന്നതാണ് ഇന്നിങ്സ്. ഡുഷൻ ഹേമന്ദ 4 റൺസുമായി പുറത്താകാതെനിന്നു. നെതർലൻഡ്സിനായി ആര്യൻ ദത്ത് 3 വിക്കറ്റ് വീഴ്ത്തി.