ലോകകപ്പ് ക്രിക്കറ്റ്; അഫ്ഗാനെതിരെ ഇന്ത്യക്ക് ആധികാരിക ജയം; സെഞ്ചുറിയടിച്ച് ഹിറ്റ്മാൻ

News Desk

11 October 2023 09:35 PM

ഏകദിന ലോകകപ്പില്‍ രണ്ടാമങ്കവും ജയിച്ച് ഹിറ്റ്മാനും സംഘവും. അഫ്ഗാനിസ്ഥാനെതിരെ എട്ട് വിക്കറ്റിന്റെ ആധികാരിക വിജയമാണ് ഇന്ത്യ സ്വന്തമാക്കിയത്. അഫ്ഗാന്‍ ഉയര്‍ത്തിയ 273 റണ്‍സെന്ന വിജയലക്ഷ്യം 90 പന്തുകള്‍ ബാക്കിനില്‍ക്കെ വെറും രണ്ട് വിക്കറ്റ് നഷ്ടത്തില്‍ ഇന്ത്യ മറികടന്നു. 84 പന്തില്‍ 131 റണ്‍സെടുത്ത ക്യാപ്റ്റന്‍ രോഹിത് ശര്‍മ്മയാണ് ഇന്ത്യയുടെ ടോപ് സ്‌കോറര്‍. മത്സരത്തില്‍ വിരാട് കോഹ്‌ലി അര്‍ധ സെഞ്ച്വറി നേടി തിളങ്ങി.

ടോസ് നേടി ആദ്യം ബാറ്റിങ്ങിനിറങ്ങിയ അഫ്ഗാനിസ്ഥാന് മികച്ച തുടക്കമായിരുന്നില്ല ലഭിച്ചത്. എന്നാൽ നാലാം വിക്കറ്റിൽ ഒരുമിച്ച ഹഷ്മത്തുള്ള ഷഹീദി- അസ്മത്തുള്ള ഒമർസായി സഖ്യം നടത്തിയ രക്ഷാപ്രവർത്തനം പൊരുതാനുള്ള ടോട്ടൽ സമ്മാനിച്ചു. ഒരു ഘട്ടത്തിൽ 300 കടക്കുമെന്ന് തോന്നിച്ച അഫ്ഗാനെ പക്ഷേ അവസാന ഓവറുകളിൽ ഇന്ത്യൻ ബൗളർമാർ പിടിച്ചുക്കെട്ടി.

ഇഷാൻ കിഷൻ 47 (47 പന്ത്), വിരാട് കോലി 55 (56 പന്ത് നോട്ടൗട്ട്), ശ്രേയസ് അയ്യർ 25 (23 പന്ത് നോട്ടൗട്ട്) എന്നിങ്ങനെയാണ് മറ്റ് ഇന്ത്യൻ ബാറ്സ്മാന്മാരുടെ റൺസ് നേട്ടം. റാഷിദ് ഖാനാണ് അഫ്ഗാനിസ്ഥാന് വേണ്ടി രണ്ട് വിക്കറ്റുകളും വീഴ്ത്തിയത്.