'ബിജെപി വിഷപ്പാമ്പ്, എഐഎഡിഎംകെയെ പോലുളള കുറ്റിക്കാടുകൾ വെട്ടിക്കളയണം'; ഉദയനിധി സ്റ്റാലിൻ
സനാതന ധർമ്മ വിവാദത്തിന് പിന്നാലെ ബിജെപിക്കെതിരെ രൂക്ഷവിമർശനവുമായി തമിഴ്നാട് മന്ത്രി ഉദയനിധി സ്റ്റാലിൻ. ബിജെപി വഷപ്പാമ്പാണെന്നാണ് ഉദയനിധിയുടെ പുതിയ പരാമർശം. എഐഎഡിഎംകെയെയും ഉദയനിധി വിമർശിച്ചു. നെയ് വേലിയിൽ ഡിഎംകെ എംഎൽഎ സഭാ രാജേന്ദ്രന്റെ വിവാഹാഘോഷത്തിൽ പങ്കെടുത്തുകൊണ്ടായിരുന്നു ഉദയനിധിയുടെ വിമർശനം.
'ഒരു വിഷപ്പാമ്പ് നിങ്ങളുടെ വീട്ടിലേക്ക് കടന്നാൽ അതിനെ പുറത്തേക്ക് വലിച്ചെറിയരുത്. എന്തുകൊണ്ടെന്നാൽ അത് നിങ്ങളുടെ വീടിനടുത്തുള്ള ചപ്പുചവറുകളിൽ ഒളിച്ചിരുന്നേക്കാം. നിങ്ങൾ കുറ്റിക്കാടുകൾ വെട്ടിക്കളയണം. അല്ലെങ്കിൽ ആ പാമ്പ് നിങ്ങളുടെ വീട്ടിലേക്ക് മടങ്ങിവരും,' ഉദയനിധി സ്റ്റാലിൻ പറഞ്ഞു.
'നിലവിലുളള സാഹചര്യങ്ങളുമായി ഇതിനെ താരതമ്യം ചെയ്യുകയാണെങ്കിൽ, തമിഴ്നാടിനെ ഞങ്ങളുടെ വീടായും ബിജെപിയെ വിഷപ്പാമ്പായും ഞങ്ങളുടെ വീടിനടുത്തുള്ള ചപ്പുചവറുകളെ എഐഎഡിഎംകെയായും ഞാൻ കരുതുന്നു. നിങ്ങൾ ചപ്പുചവറുകൾ നീക്കം ചെയ്തില്ലെങ്കിൽ നിങ്ങൾക്ക് സൂക്ഷിക്കാൻ കഴിയില്ല. ബിജെപിയെ തുരത്താൻ എഐഎഡിഎംകെയെ ഇല്ലാതാക്കണം,' അദ്ദേഹം കൂട്ടിച്ചേർത്തു.