ജസ്റ്റിസ് ആശിഷ് ജിതേന്ദ്ര ദേശായി കേരളാ ഹൈക്കോടതി ചീഫ് ജസ്റ്റിസ്; നിയമന ഉത്തരവ് പുറത്തിറങ്ങി
ജസ്റ്റിസ് ആശിഷ് ജിതേന്ദ്ര ദേശായി കേരളാ ഹൈക്കോടതിയുടെ പുതിയ ചീഫ് ജസ്റ്റിസാകും. അദ്ദേഹത്തെ ചുമതലയിൽ നിയോഗിച്ചുകൊണ്ടുള്ള നിയമന ഉത്തരവ് പുറത്തിറങ്ങി. നിലവിലെ ചീഫ് ജസ്റ്റിസ് എസ് വി ഭട്ടിയെ സുപ്രീംകോടതി ജഡ്ജിയായി ശുപാർശ ചെയ്ത ഒഴിവിലാണ് പുതിയ നിയമനം.
അഹമ്മദാബാദിലെ സെന്റ് സേവ്യേഴ്സ് കോളേജിൽ നിന്ന് സാമ്പത്തിക ശാസ്ത്രത്തിൽ ബിരുദവും അഹമ്മദാബാദിലെ സർ LA ഷാ ലോ കോളേജിൽ നിന്ന് നിയമ ബിരുദവും നേടിയ ജസ്റ്റിസ് ആശിഷ് ജിതേന്ദ്ര ദേശായി തുടക്കത്തിൽ എം സി ഭട്ടിന്റെയും ഡി എം ഭട്ടിന്റെയും നിയമകാര്യാലയത്തിലായിരുന്നു ജോലി ചെയ്തിരുന്നത്. ആദ്യം അഹമ്മദാബാദിലെ സിറ്റി സിവിൽ ആൻഡ് സെഷൻസ് കോടതിയിലും പിന്നീട് ഗുജറാത്ത് ഹൈക്കോടതിയിലും അഭിഭാഷകനായി. 2011-ൽ ഗുജറാത്ത് ഹൈക്കോടതിയിലെ അഡീഷണൽ ജഡ്ജിയായ അദ്ദേഹം 2013-ൽ സ്ഥിരം ജഡ്ജിയായി നിയമിതനായി.