വികസന കാര്യത്തില്‍ യോജിച്ച് മുന്നോട്ട് പോകണമെന്ന് ന്യൂഡല്‍ഹിയിലെ കേരള സര്‍ക്കാര്‍ പ്രതിനിധി കെ വി തോമസ്. വികസനത്തില്‍ അമിതമായ രാഷ്ട്രീയം കൊണ്ടുവരരുതെന്നും കോണ്‍ഗ്രസുകാര്‍ കാര്യങ്ങള്‍ പഠിക്കൂ എന്നും അദ്ദേഹം വിമര്‍ശിച്ചു. ഇ ശ്രീധരന്റെ കഴിവ് നിഷേധിക്കാന്‍ കഴിയില്ലെന്നും റിപ്പോര്‍ട്ടറിനോട് കെ വി തോമസ് പറഞ്ഞു.

' കൊച്ചി വിമാനത്താവളവും കൊച്ചി മെട്രോയും വന്നപ്പോള്‍ പ്രതിഷേധമുണ്ടായി. പിന്നീട് അത് യാഥാര്‍ത്ഥ്യമായി. കെ റെയില്‍ മുഖ്യമന്ത്രി പരിശോധിക്കട്ടെ, ശേഷം സര്‍ക്കാര്‍ അഭിപ്രായം പറയും. കോണ്‍ഗ്രസുകാര്‍ കാത്തിരുന്ന് കാണൂ, കാര്യങ്ങള്‍ പഠിക്കൂ. കോണ്‍ഗ്രസിന്റെ ആരോപണത്തിന് പ്രസക്തിയുണ്ടോ? നാളെ ജനങ്ങളുടെ മുന്നില്‍ മറുപടി പറയേണ്ടിവരും. ഇ ശ്രീധരന്റെ കഴിവ് നിഷേധിക്കാന്‍ കഴിയില്ല. ശ്രീധരന്റെ രാഷ്ട്രീയം അവിടെ നില്‍ക്കട്ടെ. കെ കരുണാകരനാണ് ശ്രീധരനെ പല പദ്ധതികളിലും കൊണ്ടുവന്നത്', കെ വി തോമസ് പറഞ്ഞു.

കേരളത്തില്‍ നടപ്പാക്കാന്‍ കഴിയില്ല എന്ന് കരുതിയ പദ്ധതികള്‍ നടപ്പാക്കിയ മുഖ്യമന്ത്രിയാണ് പിണറായി വിജയന്‍. കെ റെയിലില്‍ കേന്ദ്രവുമായി പല തവണ ചര്‍ച്ച ചെയ്തിട്ടുണ്ട്. റെയില്‍വേ ബോര്‍ഡിന്റെ അംഗീകാരം വേണം. അതിന് വേണ്ടിയാണ് ശ്രമിക്കുന്നത്. ശ്രീധരനുമായുള്ള കൂടിക്കാഴ്ചയില്‍ തീരുമാനം മുഖ്യമന്ത്രിയുടേതാണെന്നും കെ വി തോമസ് പ്രതികരിച്ചു.