100 മില്ല്യൺ അടിച്ച് ത്രെഡ്സ്; ട്വിറ്ററിന്റെ ട്രാഫിക്കിൽ വൻ ഇടിവ്
ജനപ്രിയ മൈക്രോ ബ്ലോഗിംഗ് ആപ്ലിക്കേഷനുകളിലൊന്നായ ട്വിറ്ററിനെ വെല്ലുവിളിച്ചുകൊണ്ട് രംഗപ്രവേശനം നടത്തിയ ത്രെഡ്സ് ആപ്പ് ജൈത്രയാത്ര തുടർന്നുകൊണ്ടിരിക്കുകയാണ്. നിലവിൽ ഇലോൺ മസ്കിന്റെ ഉടമസ്ഥതയിലുള്ള ട്വിറ്ററിന് പകരക്കാരൻ എന്ന നിലയിൽ ജനപ്രീതി നേടിയ മറ്റൊരു ആപ്ലിക്കേഷൻ ഇതുവരെ ഉണ്ടായിരുന്നില്ല. എന്നാൽ ത്രെഡ്സിന്റെ കടന്നുവരവോടെ ട്വിറ്ററിന്റെ ട്രാഫിക്കിൽ വൻ ഇടിവാണ് വന്നിരിക്കുന്നതെന്ന് ക്ലൗഡ്ഫ്ളയർ സിഇഒ മാത്യു പ്രിൻസ് അറിയിച്ചു. ‘ട്വിറ്റർ ട്രാഫിക് ടാഗിംഗ്’ എന്ന ട്വീറ്റ്, ക്ലൗഡ്ഫ്ളയർ വിശകലനത്തെ അടിസ്ഥാനപ്പെടുത്തിയുള്ളതാണ്. ഇന്റർനെറ്റുമായി ബന്ധിപ്പിക്കുന്ന എന്തിന്റെയും സുരക്ഷയും വിശ്വാസ്യതയും കണക്കിലെടുത്ത് പ്രവർത്തിക്കുന്ന ഒരു ശൃംഖലയാണിത്. ക്ലൗഡ്ഫ്ളയർ ഡാറ്റ പ്രകാരം ത്രെഡ്സ് ആപ്പിന്റെ കടന്നുവരവോടെ 2023 ജൂലൈയിൽ ട്വിറ്ററിന്റെ ട്രാഫിക്കിൽ കുറവ് വന്നതായി കാണിക്കുന്നു. ത്രെഡ്സിന്റെ കടന്നു വരവിനു മുമ്പും ട്വിറ്ററിന് ഉപയോക്താക്കളിൽ നിന്നും പരസ്യദാതാക്കളിൽ നിന്നും തിരിച്ചടികൾ ഏറ്റിട്ടുളളതായി റിപ്പോർട്ടുകൾ പറയുന്നുണ്ട്. ട്വിറ്ററിൽ, ഉപയോക്താക്കൾക്ക് ട്വീറ്റുകൾ വായിക്കുന്നതിന് പരിധി നിർണയിച്ചതും വേരിഫൈഡ് അക്കൗണ്ടിന് ഉയർന്ന ചാർജ്ജ് ചുമത്തിയതും ട്വിറ്ററിന് തിരിച്ചടിയായി മാറിയിരുന്നു. ക്ലൗഡ്ഫ്ളയർ ഡാറ്റ പ്രകാരം ഡൊമൈൻ റാങ്കിംഗ് 37-ാം സ്ഥാനത്താണ് ട്വിറ്റർ നിൽക്കുന്നത്. ജൂലൈ ആറിനാണ് ‘ത്രെഡ്സ്’ എന്ന പുതിയ ആപ്പ് ഇൻസ്റ്റഗ്രാം അവതരിപ്പിച്ചത്. പരിമിത ടെക്സ്റ്റിലധിഷ്ഠിതമായ ആശയവിനിമയമാണ് ആപ്പ് ഉപഭോക്താൾക്ക് നൽകുന്നത്.