മെറ്റ പുറത്തിറക്കിയ പുതിയ ആപ്ലിക്കേഷനായ ത്രെഡ്സിനെതിരെ നിയമനടപടിക്കൊരുങ്ങി ട്വിറ്റർ. ട്വിറ്ററിൻ്റെ വ്യാപാര രഹസ്യങ്ങളും ബൗദ്ധിക സ്വത്തുക്കളും മെറ്റ ത്രെഡ്സ് ദുരുപയോ​ഗം ചെയ്യുന്നു എന്നാണ് ആരോപണം. കേസെടുക്കുമെന്ന് മുന്നറിയിപ്പ് നൽകി ട്വിറ്റർ ആഭിഭാഷകൻ അലക്സ് സ്പിറോ മെറ്റ സിഇഒ മാർക്ക് സക്കർബർ​ഗിന് കത്തയച്ചതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു.

വ്യാപാരരഹസ്യങ്ങൾ ചോർത്തുന്നതിനായി ട്വിറ്ററിൽ നിന്ന് വിരമിച്ച ജോലിക്കാരെ ത്രെഡ്സിലേക്ക് മെറ്റ നിയമിച്ചതായും കത്തിൽ ആരോപിക്കുന്നു. ട്വിറ്ററിന്റെ ആരോപണങ്ങൾ അടിസ്ഥാനരഹിതമാണെന്ന് മെറ്റയുടെ കമ്മ്യൂണിക്കേഷൻസ് ഡയറക്ടർ ആൻഡി സ്റ്റോൺ പ്രതികരിച്ചു. ത്രെ‍ഡ്സ് ജീവനക്കാരിൽ ആരും ട്വിറ്ററിൽ നിന്ന് വന്നവരല്ലെന്നും അദ്ദേഹം പറഞ്ഞു.

വാർത്തകൾ വന്നതിന് ശേഷം, 'മത്സരം നല്ലതാണ്, വഞ്ചനയല്ല' എന്ന ട്വീറ്റുമായി ട്വിറ്റർ ഉടമസ്ഥൻ ഇലോൺ മസ്ക് രം​ഗത്തെത്തി. 30 ദശലക്ഷം ഉപഭോക്താക്കളെയാണ് ഒരു ദിവസം തികയും മുൻപ് ത്രെഡ്സ് നേടിയത്. ത്രെഡ്സിൻ്റെ വരവ് ട്വിറ്ററിന് വെല്ലുവിളി ഉയർത്തിയിരുന്നു.