തിരുവനന്തപുരം മെഡിക്കൽ കോളേജിൽ അഡ്മിഷൻ കിട്ടി എന്ന് സന്ദേശം; 6 മാസം ഓൺലൈൻ ക്ലാസ്സ്; നടന്നത് വൻ തട്ടിപ്പ്
തിരുവനന്തപുരം മെഡിക്കല്‍ കോളജില്‍ എംബിബിഎസ് പഠനത്തിന് പ്രവേശനം ലഭിച്ചതായി വ്യാജ ഇമെയില്‍ സന്ദേശമയച്ചും ഓണ്‍ലൈനില്‍ ക്ലാസ് നടത്തിയും തട്ടിപ്പ്.
സന്ദേശം വിശ്വസിച്ച്‌ ആറുമാസം ഓണ്‍ലൈൻ ക്ലാസില്‍ പങ്കെടുത്ത മൂന്നാര്‍ സ്വദേശിയായ പെണ്‍കുട്ടി തട്ടിപ്പു തിരിച്ചറിഞ്ഞത് മെഡിക്കല്‍ കോളജില്‍ നേരിട്ടുപോയപ്പോള്‍. ഇമെയില്‍ വിലാസം, പണം ഓണ്‍ലൈനായി കൈമാറിയ മൊബൈല്‍ നമ്ബര്‍ എന്നിവ സഹിതം പെണ്‍കുട്ടിയുടെ മാതാപിതാക്കള്‍ മൂന്നാര്‍ പൊലീസില്‍ പരാതി നല്‍കി. സമാനതകളില്ലാത്ത തട്ടിപ്പാണ് നടന്നത്.
മൂന്നാറിലെ സ്വകാര്യ സ്‌കൂളില്‍ നിന്ന് പ്ലസ്ടുവിന് ഉന്നതവിജയം നേടിയ പെണ്‍കുട്ടി 2022ലെ നീറ്റ് പരീക്ഷയിലും ഉയര്‍ന്ന മാര്‍ക്ക് നേടിയിരുന്നു. സംവരണവിഭാഗത്തില്‍പെട്ട കുട്ടി വിവിധ മെഡിക്കല്‍ കോളജുകളില്‍ അപേക്ഷ നല്‍കി.
പ്രവേശന നടപടികള്‍ പൂര്‍ത്തിയായി സീറ്റ് ലഭിച്ചതായി തിരുവനന്തപുരം മെഡിക്കല്‍ കോളജിന്റെ പേരില്‍ പെണ്‍കുട്ടിക്ക് ഇമെയില്‍ സന്ദേശം ലഭിച്ചു. 25,000 രൂപ ഫീസായി അടയ്ക്കണമെന്ന് ആവശ്യപ്പെട്ടു. ആദ്യ ഗഡുവായി 10,000 രൂപ ഗൂഗിള്‍ പേ വഴി അടച്ചു. അങ്ങനെ പണം പോയി.
2022 നവംബറില്‍ ഓണ്‍ലൈൻ ക്ലാസ് ആരംഭിച്ചു. 2 സ്ത്രീകളും ഒരു പുരുഷനുമായിരുന്നു ക്ലാസുകളെടുത്തിരുന്നത്. കോളജില്‍ വരാൻ നിര്‍ദേശിച്ച്‌ 3 പ്രാവശ്യം ഇമെയില്‍ വന്നു. പിന്നീടു വരേണ്ട എന്ന സന്ദേശം ലഭിച്ചു. ജൂണ്‍ 24നു മെഡിക്കല്‍ കോളജില്‍ നേരിട്ടു ഹാജരാകാനാവശ്യപ്പെട്ടു വീണ്ടും സന്ദേശം ലഭിച്ചു. പിന്നീട് വരേണ്ട എന്ന അറിയിപ്പും കിട്ടി. ഇതോടെയാണ് സംശയമായത്.
അന്നു തന്നെ തിരുവനന്തപുരത്തേക്കു തിരിച്ചു. 24നു കോളജിലെത്തി പ്രിൻസിപ്പലിനെ കണ്ടപ്പോഴാണു തട്ടിപ്പു തിരിച്ചറിയുന്നത്. മെഡിക്കല്‍ കോളജിലെ അതേ ക്ലാസുകളാണ് ഓണ്‍ലൈനായി പെണ്‍കുട്ടി ആറുമാസം പഠിച്ചതെന്നു പ്രിൻസിപ്പല്‍ അറിയിച്ചതായി പരാതിയില്‍ പറയുന്നു. ഇതും ദുരൂഹമാണ്. ഗൂഗിള്‍ പേ നമ്ബറിലൂടെ പ്രതികളെ കണ്ടെത്താമെന്നാണ് പ്രതീക്ഷ.
Related News
അരവിന്ദ് കെജ്രിവാളിന് ജൂൺ ഒന്നുവരെ ഇടക്കാലജാമ്യം
പാനൂരിലെ വിഷ്ണുപ്രിയ കൊലക്കേസ്; പ്രതി ശ്യാംജിത്ത് കുറ്റക്കാരനെന്ന് കോടതി
ചക്കുളത്തുകാവ് ക്ഷേത്രത്തിലും അരളിപ്പൂവിന് നിരോധനം
അരളിപ്പൂവ് വേണ്ടെന്ന് മലബാർ ദേവസ്വം ബോർഡും, നിരോധന ഉത്തരവ് നാളെ ഇറക്കും
യുവതി വാടക വീട്ടിൽ മരിച്ച നിലയിൽ, ഒപ്പം താമസിച്ചയാളെ കാണാനില്ല; ദുരൂഹത