ലക്ഷദ്വീപില് സ്വകാര്യ ഭൂമി ഏറ്റെടുക്കുന്ന നടപടി നിര്ത്തിവെച്ചു
കവരത്തി : കവരത്തി ദ്വീപില് സ്വകാര്യ വ്യക്തികളുടെ ഭൂമി ഏറ്റെടുക്കുന്നത് ഭരണകൂടം നിര്ത്തി വെച്ചു. ഇതിന്റെ ഭാഗമായി റവന്യൂ ഉദ്യോഗസ്ഥര് സ്വകാര്യ ഭൂമിയില് സ്ഥാപിച്ച കൊടികള് എടുത്ത്മാറ്റി. ഭൂവുടമകളെ അറിയിക്കാതെ സ്ഥലം ഏറ്റെടുക്കാനുള്ള ശ്രമം വലിയ പ്രതിഷേധത്തിന് ഇടയാക്കിയിരുന്നു. പ്രതിഷേധം ശക്തമായതോടെയാണ് ഭരണകൂടം നടപടികള് താല്ക്കാലികമായെങ്കിലും നിര്ത്തിയത്.
വിവാദമായ നടപടികള് തുടരുന്ന അഡ്മിനിട്രേറ്റര് പ്രഫുല് പട്ടേല് ദ്വീപിലെത്തിയതിന്റെ അടുത്ത ദിവസമാണ് ഭൂമി ഏറ്റെടുക്കല് നടപടികള് ആരംഭിച്ചത്. കവരത്തി പിഡബ്ല്യുഡി ഓഫീസിന് എതര്വശത്തടക്കം 20 ഓളം സ്വകാര്യ വ്യക്തികളുടെ ഭൂമിയിലാണ് ഉദ്യോഗസ്ഥര് കഴിഞ്ഞ ദിവസം ചുവന്ന കൊടി നാട്ടിയത്. വീട്ടുകാരെ അറിയിക്കാതെയായിരുന്നു നടപടി.
ലക്ഷ്ദ്വീപിന്റെ വികസനത്തിനായ വന്തോതില് ഭൂമി ഏറ്റെടുക്കുന്നതടക്കമുള്ള തീരുമാനങ്ങള് ഉള്ക്കൊള്ളിച്ചതാണ് ലക്ഷദ്വീപ് വികസന അതോറിറ്റി കരട് നിയമം. ഈ കരട് നിയമം അതേ പടി നടപ്പാക്കേണ്ടതുണ്ടോ എന്നതില് തീരുമാനം ആയിട്ടില്ല. ഇതിനിടെയാണ് ഭൂമി ഏറ്റെടുക്കലുമായി ഭരണകൂടം മുന്നോട്ട് പോകുന്നത്. തന്റെ ഭരണപരിഷ്കാരങ്ങള് നടപ്പാക്കുന്നതില് വേഗത പോരെന്ന് പറഞ്ഞ് കഴിഞ്ഞ ദിവസം ഉദ്യോഗസ്ഥരെ അഡ്മിനിസ്ടേറ്റര് വിമര്ശിച്ചിരുന്നു. ഇതിന് പിന്നാലെയാണ് ഭൂമി ഏറ്റെടുക്കല് റവന്യു വകുപ്പ് വേഗത്തിലാക്കിയത്.