ശബ്ദരേഖ കൃത്രിമമെങ്കില് തെളിയിക്കാന് സുരേന്ദ്രനെ വെല്ലുവിളിച്ച് പ്രസീത
കണ്ണൂര് > സി കെ ജാനുവിന് എന്ഡിഎ സ്ഥാനാര്ഥിയായി മത്സരിക്കാന് ബിജെപി സംസ്ഥാന പ്രസിഡന്റ് കെ സുരേന്ദ്രന് പത്ത് ലക്ഷം രൂപ നല്കിയതിന് തെളിവായി പുറത്ത് വിട്ട ശബ്ദരേഖ കൃത്രിമമാണെങ്കില് അത് തെളിയിക്കാന് വെല്ലുവിളിച്ച് പ്രസീത. സി കെ ജാനുവിന്റെ പാര്ടിയായ ജെആര്പിയുടെ സംസ്ഥാന ട്രഷറര് ആയ പ്രസീതയാണ് പണം കൈമാറ്റവുമായി ബന്ധപ്പെട്ട് സുരേന്ദ്രനുമായി സംസാരിച്ചതിന്റെ ശബ്ദരേഖ ഇന്നലെ പുറത്തുവിട്ടത്. മാര്ച്ച് 7ന് പണം കൈമാറുന്നതിന് മുന്പും കെ സുരേന്ദ്രന് ആശയവിനിമയം നടത്തിയിരുന്നുവെന്നും പ്രസീത പറഞ്ഞു.
ശാസ്ത്രീയമായി പരിശോധിച്ച് ശബ്ദരേഖയുടെ ആധികാരികത തെളിയിക്കണം. മാര്ച്ച് ഏഴിന് തിരുവനന്തപുരത്തെ ഹോട്ടലില് വച്ചാണ് സുരേന്ദ്രന് പണം കൈമാറിയതെന്നും പ്രസീത കണ്ണൂരില് വ്യക്തമാക്കി.
തന്റേതെന്ന് പ്രചരിക്കുന്ന സന്ദേശത്തില് കൃത്രിമം നടന്നതായി സംശയിക്കുന്നുണ്ടെന്നും ഒരു ഓഡിയോ റെക്കോര്ഡ് ചെയ്ത് അതില് ആവശ്യമില്ലാത്തത് കട്ട് ചെയ്യാനും കൂട്ടി ചേര്ക്കാനും ഒന്നും ഒരു ബുദ്ധിമുട്ടില്ല എന്ന് ഇന്ന് കോഴിക്കോട് വാര്ത്തസമ്മേളനത്തില് സുരേന്ദ്രന് പറഞ്ഞിരുന്നു. ഒരു രൂപപോലും സി കെ ജാനുവിന് നല്കിയിട്ടില്ലെന്നും പറഞ്ഞു. ഇതേ തുടര്ന്നാണ് കൃത്രിമം തെളിയിക്കാന് പ്രസീത വെല്ലുവിളിച്ചത്.
ശബ്ദരേഖ ശാസ്ത്രീയ പരിശോധന നടത്തി സത്യം കണ്ടെത്തണം. ഒരു എഡിറ്റിംഗും ആ ഓഡിയോയില് നടത്തിയിട്ടില്ല. സികെ ജാനു കേസ് കൊടുക്കുമെന്ന് പറഞ്ഞിട്ടുണ്ട്. കെ സുരേന്ദ്രനും കേസ് കൊടുക്കണം. എന്ത് അന്വേഷണവും നേരിടാന് തയ്യാറാണെന്നും പ്രസീത പറഞ്ഞു.
മാര്ച്ച് ഏഴിന് കെ സുരേന്ദ്രന് നേരിട്ട് വന്ന് തിരുവനന്തപുരത്തെ ഹോട്ടലില് വച്ചാണ് കാശ് കൈമാറിയത്. വന്നിരുന്നു. കാശ് കിട്ടിയെന്നാണ് സികെ ജാനുവും പറഞ്ഞത്. അന്ന് രാവിലെയും വൈകിട്ടും ജാനു താമസിക്കുന്ന ഹോട്ടലില് സുരേന്ദ്രന് എത്തി. സി കെ ജാനു പണം വാങ്ങിയെന്ന് തന്നോട് സമ്മതിച്ചിരുന്നതാണ്. വയനാട്ടില് സികെ ജാനു നടത്തിയ ഇടപാടുകള് പരിശോധിച്ചാല് കാശ് ചെലവഴിച്ച കാര്യം ബോധ്യപ്പെടുമെന്നും പ്രസീത പറഞ്ഞു.