കേരളത്തില്‍ കാലവര്‍ഷം ജൂണ്‍ 3 ന് എത്തും; ജാഗ്രതാ നിര്‍ദ്ദേശം

Ajith.A

01 June 2021 03:18 PM

തിരുവനന്തപുരം; കേരളത്തില്‍ തെക്കുപടിഞ്ഞാറന്‍ കാറ്റ് ജൂണ്‍ 1 മുതല്‍ കൂടുതല്‍ ശക്തി പ്രാപിക്കുമെന്നും, ഇതോടെ കാലവര്‍ഷം ജൂണ്‍ മൂന്നോടുകൂടി കേരളത്തില്‍ എത്തുമെന്നുമാണ് റിപ്പോര്‍ട്ട്. കേരളത്തില്‍ ഇടിമിന്നലോട് കൂടിയ ശക്തമായ കാറ്റും മഴയും ഉണ്ടാകുമെന്നാണ് കാലാവസ്ഥാ വകുപ്പിന്റെ മുന്നറിയിപ്പ്. കേരള തീരത്ത് ശക്തമായ കാറ്റിന് സാധ്യത ഉള്ളതിനാല്‍ മല്‍സ്യ തൊഴിലാളികള്‍ക്ക് കടലില്‍ പോകുന്നതിന് നിയന്ത്രണം ഉണ്ട്.തെക്ക് പടിഞ്ഞാറന്‍ കാറ്റ് ജൂണ്‍ 1 മുതല്‍ ക്രമേണ കൂടുതല്‍ ശക്തമാകാന്‍ സാധ്യതയുണ്ട്. ഇതിന്റെ ഫലമായി കേരളത്തില്‍ മഴ വര്‍ദ്ധിക്കും. ജൂണ്‍ 3 നകം കേരളത്തില്‍ മണ്‍സൂണ്‍ ആരംഭിക്കാന്‍ സാധ്യതയുണ്ടെന്നുമാണ് കാലാവസ്ഥാ നിരീക്ഷണകേന്ദ്രത്തിന്റെ പ്രവചനം.

 ജൂണ്‍ ഒന്നു വരെ കേരളത്തിലും ലക്ഷദ്വീപിലും മണിക്കൂറില്‍ 40 മുതല്‍ 50 കി.മീ വരെ വേഗതയില്‍ വീശിയടിച്ചേക്കാവുന്ന ശക്തമായ കാറ്റിന് സാധ്യതയുള്ളതിനാല്‍ കേരള തീരത്ത് മത്സ്യത്തൊഴിലാളികള്‍ കടലില്‍ പോകരുതെന്നു സംസ്ഥാന ദുരന്ത നിവാരണ അതോറിറ്റിയും അറിയിച്ചിട്ടുണ്ട്. അറബിക്കടലിലും കന്യാകുമാരി തീരത്തും തെക്കന്‍ ശ്രീലങ്കന്‍തീരത്തും ജൂണ്‍ ഒന്നു മുതല്‍ മൂന്നു വരെ തെക്കുപടിഞ്ഞാറന്‍ - വടക്കുപടിഞ്ഞാറന്‍ അറബികടലിലും മണിക്കൂറില്‍ 40 മുതല്‍ 50 കി.മീ വരെ വേഗതയില്‍ വീശിയടിച്ചേക്കാവുന്ന ശക്തമായ കാറ്റിനു സാധ്യതയുണ്ടെന്നാണു കേന്ദ്ര കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. അതിനാല്‍ ഈ സമുദ്ര മേഖലകളില്‍ മത്സ്യബന്ധനത്തിനു പോകാന്‍ പാടില്ലെന്ന് നിര്‍ദേശമുണ്ട്. തെക്കന്‍ തമിഴ്നാട് തീരത്ത് 3.2 മീറ്റര്‍ വരെ ഉയരത്തില്‍ തിരമാലയ്ക്കും കടലാക്രമണത്തിനും സാധ്യതയുണ്ടെണ്ടെന്ന് ദേശീയ സമുദ്ര സ്ഥിതി പഠന ഗവേഷണ കേന്ദ്രം അറിയിച്ചിട്ടുണ്ട്.