കുഴല്പ്പണ അന്വേഷണം കെ സുരേന്ദ്രനിലേയ്ക്കോ?
തൃശൂര്:തെരഞ്ഞെടുപ്പ് പ്രചാരണത്തിനെന്ന പേരില് ബിജെപിക്കാര് കടത്തിക്കൊണ്ടുവന്ന കുഴല്പ്പണം കൊടകരയില് കവര്ന്ന കേസില് സംസ്ഥാന പ്രസിഡന്റ് കെ സുരേന്ദ്രനെ ചോദ്യം ചെയ്യാന് സാധ്യത . ബിജെപി പണമിടപാടുകളുടെ മുഖ്യ ചുമതലക്കാര് സംസ്ഥാന പ്രസിഡന്റും സംഘടനാ ജനറല് സെക്രട്ടറിയുമാണ്.
സംഘടനാ ജനറല് സെക്രട്ടറി എം ഗണേഷിനെയും സംസ്ഥാന ഓഫീസ് സെക്രട്ടറി ജി ഗിരീഷിനെയും ചോദ്യം ചെയ്തു. ഇതിന്റെ തുടര്ച്ചയായി സംസ്ഥാന പ്രസിഡന്റിന്റെയും മൊഴിയെടുക്കേണ്ടി വരുമെന്ന് അന്വേഷകസംഘം സൂചിപ്പിച്ചു.
കേസില് ബിജെപി തൃശൂര് ജില്ലാ ഓഫീസ് സെക്രട്ടറി സതീശനെ തിങ്കളാഴ്ച ചോദ്യം ചെയ്യും. പണം കടത്തിയ ആര്എസ്എസ് പ്രവര്ത്തകന് ധര്മരാജിന്റെ മൊഴിപ്രകാരമാണ് സതീശനെ ചോദ്യംചെയ്യുന്നത്. തൃശൂരില് താമസ സൗകര്യമൊരുക്കിയത് സതീശനുള്പ്പെടെ ജില്ലാ നേതാക്കളാണെന്നാണ് മൊഴി. ചോദ്യം ചെയ്യലില് കുഴല്പ്പണവുമായി ബന്ധമില്ലെന്നുള്ള ഒരേ മറുപടിയാണ് എം ഗണേഷ്, ജി ഗീരീഷ്, ആലപ്പുഴ ജില്ലാ ട്രഷറര് കെ ജി കര്ത്ത എന്നിവര് നല്കിയത്.
എന്നാല് പണക്കടത്തുമായി കൂടുതല് വിവരങ്ങള് സംസ്ഥാന പ്രസിഡന്റിനോട് ചോദിക്കണമെന്ന് കര്ത്ത വ്യക്തമാക്കിയിരുന്നു. ചോദ്യംചെയ്യലിന് മുന്നോടിയായി ഇവര് പരസ്പരം ഫോണില് സംസാരിച്ചതായും വിവരം ലഭിച്ചു. മൂന്നുപേരെയും ഡിജിറ്റല് തെളിവുകളുടെ അടിസ്ഥാനത്തില് വീണ്ടും ചോദ്യംചെയ്യും. കവര്ച്ചയ്ക്കുശേഷം ജില്ലാ നേതാക്കളിലൊരാള് വന് പണമിടപാട് നടത്തിയതായും വിവരം ലഭിച്ചു. പണം കൈമാറിയ ബിനാമിയേയും ഉടന് ചോദ്യംചെയ്യും.