ബിഹാറിൽ നിർമാണത്തിലിരുന്ന പാലം തകർന്ന് തൊഴിലാളി മരിച്ചു; ഒമ്പത് പേർക്ക് പരിക്ക്

ബിഹാറിലെ സുപോളിൽ നിർമാണത്തിലിരുന്ന പാലം തകർന്ന് വീണ് തൊഴിലാളി മരിച്ചു. വെള്ളിയാഴ്ച രാവിലെയോടെയാണ് അപകടം. കോസി നദിക്ക് കുറുകെ നിർമാണത്തിലിരിക്കുന്ന പാലമാണ് തകർന്നു വീണത്. അപകടത്തിൽ ഒമ്പത് പേർക്ക് പരിക്കേറ്റതായി ജില്ലാ മജിസ്‌ട്രേറ്റ് കൗശൽ കുമാർ അറിയിച്ചു. 

മരിച്ചയാളുടെ കുടുംബത്തിനും പരിക്കേറ്റവർക്കും ഉചിതമായ നഷ്ടപരിഹാരം നൽകുമെന്ന് എൻഎച്ച്എഐ റീജിയണൽ ഓഫീസർ വൈബി സിംഗ് പറഞ്ഞു.  റോഡ് നിർമ്മാണത്തിൻ്റെ ചുമതലയുള്ള ഉപമുഖ്യമന്ത്രി വിജയ് കുമാർ സിൻഹ അന്വേഷണത്തിന് ഉത്തരവിട്ടുണ്ട്.

984 കോടി രൂപ ചെലവിൽ നിർമിക്കുന്ന ഈ പാലം ഭഗൽപൂർ, ഖഗാരിയ ജില്ലകളെ തമ്മിൽ ബന്ധിപ്പിക്കുന്നതാണ്. കഴിഞ്ഞ വർഷം ബിഹാറിൽ ഗംഗയ്ക്ക് കുറുകെ 1,700 കോടിയിലധികം രൂപ ചിലവഴിച്ച് നിർമിച്ച പാലം തകർന്ന് വീണിരുന്നു.