എസ്ഐയെ കാറിടിച്ച് കൊല്ലാൻ ശ്രമിച്ച പ്രതി കീഴടങ്ങി

വാഹനപരിശോധനയ്ക്കിടെ കല്ലൂർക്കാട് പാെലീസ് സ്‌റ്റേഷനിലെ ഗ്രേഡ് എസ്ഐ ഇ എം മുഹമ്മദിനെ കാറിടിച്ച് കൊല്ലാൻ ശ്രമിച്ച കേസിലെ ഒന്നാം പ്രതി കീഴടങ്ങി. പ്രതി ഷെരീഫ് ഷംസുദീൻ മൂവാറ്റുപുഴ കോടതിയിലാണ് കീഴടങ്ങിയത്. ജൂൺ 14ന് വൈകിട്ട് നാലരയോടെ കല്ലൂർക്കാട് തൊടുപുഴ റൂട്ടിൽ നാഗപ്പുഴ വഴിയാഞ്ചിറയിലാണ്‌ സംഭവം. രണ്ടുപേർ സഞ്ചരിച്ച സാൻട്രോ കാറാണ് എസ്ഐയെ ഇടിച്ചിട്ടത്. സംഭവശേഷം കാർ നിർത്താതെ തൊടുപുഴ ഭാഗത്തേക്ക് ഓടിച്ചുപോയി. കാർ കയറിയിറങ്ങി മുഹമ്മദിന്റെ വലതുകാലിലെ പാദത്തിൽ പൊട്ടലേറ്റു. ഗുരുതരമായി പരുക്കേറ്റ മുഹമ്മദിനെ തൊടുപുഴയിലെ സ്വകാര്യ ആശുപത്രിയിൽ പ്രവേശിപ്പിച്ച ശേഷം അടിയന്തര ശസ്ത്രക്രിയയ്ക്കു വിധേയനാക്കിയിരുന്നു. വധശ്രമത്തിനും ഔദ്യോഗിക കൃത്യനിർവഹണം തടസ്സപ്പെടുത്തി ദേഹോപദ്രവമേൽപ്പിച്ച് പരിക്കേൽപ്പിച്ചതിനുമാണ് പൊലീസ് കേസെടുത്തത്.