നവീകരിച്ച ആയമ്പള്ളി കുളം ഉദ്ഘാടനം ചെയ്തു

എല്ലാ ജലസ്രോതസുകളും സംരക്ഷിക്കും: മന്ത്രി റോഷി അഗസ്റ്റിന്‍

എല്ലാ ജലസ്രോതസുകളും സംരക്ഷിക്കുമെന്ന് ജലവിഭവ വകുപ്പ് മന്ത്രി റോഷി അഗസ്റ്റിന്‍. നവീകരിച്ച ശ്രീകൃഷ്ണപുരം ആയമ്പള്ളി കുളത്തിന്റെ ഉദ്ഘാടനം നിര്‍വഹിച്ച് സംസാരിക്കുകയായിരുന്നു അദ്ദേഹം. ചെറുതും വലുതുമായ ജലസ്രോതസുകള്‍ നവീകരിക്കാന്‍ സര്‍ക്കാര്‍ എടുത്ത തീരുമാനത്തിന്റെ ഭാഗമായാണ് 2021-2022 സാമ്പത്തികവര്‍ഷം പ്ലാന്‍ ഫണ്ടില്‍ ഉള്‍പ്പെടുത്തി 42 ലക്ഷം രൂപ അനുവദിച്ച് പ്രവൃത്തി പൂര്‍ത്തീകരിച്ചത്.

കുളം നവീകരണം എന്നതല്ല ജലസംരക്ഷണം എന്നതാണ് പരമപ്രധാനമായ ലക്ഷ്യമെന്നും മന്ത്രി കൂട്ടിച്ചേര്‍ത്തു. ആയമ്പള്ളി ശിവക്ഷേത്ര പരിസരത്ത് നടന്ന പരിപാടിയില്‍ കെ. പ്രേംകുമാര്‍ എം.എല്‍.എ അധ്യക്ഷനായി. ശ്രീകൃഷ്ണപുരം ബ്ലോക്ക് പഞ്ചായത്ത് പ്രസിഡന്റ് സുനിത ജോസഫ്, ഗ്രാമപഞ്ചായത്ത് പ്രസിഡന്റ് സി. രാജിക, വിവിധ സ്റ്റാന്‍ഡിങ് കമ്മിറ്റി അധ്യക്ഷര്‍, ജനപ്രതിനിധികള്‍, വകുപ്പ് തല ഉദ്യോഗസ്ഥര്‍ എന്നിവര്‍ പങ്കെടുത്തു.