നിയന്ത്രണം വിട്ട് കെഎസ്‌ആ‌ര്‍ടിസി ബസ് തങ്ങിനിന്നത് കോളേജ് ഹോസ്റ്റലിലെ മതിലിന് മുകളില്‍

ഇടുക്കി: നിയന്ത്രണം വിട്ട് കെഎസ്‌ആര്‍ടിസി ബസ് റോഡില്‍ നിന്നും തെന്നിമാറി അപകടം. പീരുമേട് കരടിക്കുഴി അയ്യപ്പ കോളേജിന് സമീപം ഇന്ന് പുലര്‍ച്ചെ അഞ്ച് മണിയോടുകൂടിയായിരുന്നു സംഭവം.

വലിയ തിട്ടക്ക് മുകളില്‍ ബസ് തട്ടി താഴേക്ക് മറിയാതിരുന്നതിനാല്‍ വലിയ അപകടം ഒഴിവായെന്നാണ് നാട്ടുകാര്‍ പറയുന്നത്.

കുമളി ഡിപ്പോയില്‍ നിന്നും കൊല്ലത്തേക്ക് പോകുകയായിരുന്ന കെഎസ്‌ആര്‍ടിസി ബസാണ് നിയന്ത്രണം നഷ്ടമായി റോഡില്‍ നിന്നും തെന്നിമാറി സംരക്ഷണ ഭിത്തിയില്‍ തങ്ങി നിന്നത്. സംരക്ഷണ ഭിത്തിക്ക് താഴ്ഭാഗത്തായി സ്വകാര്യ കോളേജിലെ ഹോസ്റ്റല്‍ സ്ഥിതി ചെയ്യുന്നുണ്ട്. ഇതിന്റെ മതിലിലാണ് ബസ് തങ്ങി നിന്നത്. അപകടം നടക്കുന്ന സമയത്ത് ഹോസ്റ്റലില്‍ വിദ്യാര്‍ത്ഥികളുണ്ടായിരുന്നു. ബസിലെ യാത്രക്കാര്‍ക്ക് പരിക്കില്ല.