‘ആരോഗ്യം ആനന്ദം, അകറ്റാം അർബുദം’ ജനകീയ ക്യാമ്പയിന് മലപ്പുറത്തും തുടക്കം
ജില്ലാതല ഉദ്ഘാടനം മന്ത്രി വി. അബ്ദുറഹ്മാൻ തിരൂരിൽ നിർവഹിച്ചുകാൻസർ രോഗ നിർണയ ചികിത്സാരംഗത്ത് വിപ്ലവകരമായ മാറ്റങ്ങൾ വരുത്താൻ കഴിയുന്ന ജനകീയ ക്യാമ്പയിനിനാണ് സംസ്ഥാനം തുടക്കം കുറിച്ചിരിക്കുന്നതെന്ന് കായിക…
ജില്ലാതല ഉദ്ഘാടനം മന്ത്രി വി. അബ്ദുറഹ്മാൻ തിരൂരിൽ നിർവഹിച്ചു
കാൻസർ രോഗ നിർണയ ചികിത്സാരംഗത്ത് വിപ്ലവകരമായ മാറ്റങ്ങൾ വരുത്താൻ കഴിയുന്ന ജനകീയ ക്യാമ്പയിനിനാണ് സംസ്ഥാനം തുടക്കം കുറിച്ചിരിക്കുന്നതെന്ന് കായിക വകുപ്പ് മന്ത്രി വി. അബ്ദുറഹ്മാൻ. ‘ആരോഗ്യം ആനന്ദം, അകറ്റാം അർബുദം’ എന്ന പേരിൽ ആരോഗ്യവകുപ്പ് സംസ്ഥാനതലത്തിൽ സംഘടിപ്പിക്കുന്ന ക്യാൻസർ പ്രതിരോധ ജനകീയ ക്യാമ്പയിൻ്റെ ജില്ലാതല ഉദ്ഘാടനം മലപ്പുറം ജില്ലയലെ തിരൂർ സംഗമം റസിഡൻസി ഹാളിൽ നിർവഹിച്ചു സംസാരിക്കുകയായിരുന്നു മന്ത്രി.
കാൻസറിനെ കുറിച്ച് സ്ത്രീകളിൽ അവബോധം വളർത്താൻ പ്രചാരണ പരിപാടികൾ കൊണ്ട് സാധിക്കും. സ്ത്രീകളിലുള്ള കാൻസർ ആരംഭത്തിൽ തന്നെ മനസ്സിലാക്കി ചികിത്സിക്കാൻ ഇതുവഴി സാധ്യമാകും. കാൻസർ സംബന്ധിച്ച് സമൂഹത്തിലുള്ള മിഥ്യാധാരണകളും ഭീതികളും അകറ്റാൻ ക്യാമ്പയിനിലൂടെ കഴിയുമെന്നും മന്ത്രി പറഞ്ഞു. തദ്ദേശ സ്വയംഭരണ സ്ഥാപനങ്ങളെ ഉൾപ്പെടെ എല്ലാവരെയും ഈ ക്യാമ്പയിന്റെ ഭാഗമായി അണിനിരത്താൻ കഴിയണമെന്നും മന്ത്രി പറഞ്ഞു .
ലോക കാൻസർ ദിനത്തോടനുബന്ധിച്ച് സംസ്ഥാന സർക്കാർ സംഘടിപ്പിക്കുന്ന ക്യാമ്പയിൻ ലോക കാൻസർ ദിനമായ ഫെബ്രുവരി നാലിന് ആരംഭിച്ച്, വനിതാ ദിനമായ മാർച്ച് എട്ടിന് അവസാനിക്കും. ആദ്യഘട്ടത്തിൽ സ്ത്രീകളെ നേരിട്ട് ബാധിക്കുന്ന ഗർഭാശയ കാൻസർ, സ്തനാർബുദം തുടങ്ങിയവയുടെ പരിശോധന ക്യാമ്പിനും ജില്ലയിൽ തുടക്കമായി. പരിപാടിയിൽ കുറുക്കോളി മൊയ്തീൻ എം.എൽ.എ അധ്യക്ഷനായി.
