സേവന മേഖലയിൽ മികവ് തെളിയിച്ച് ലീഗൽ മെട്രോളജി

ലീഗൽ മെട്രോളജി വകുപ്പ് കൂടുതൽ കാര്യക്ഷമവും സുതാര്യവുമായ സേവനങ്ങൾ ഉറപ്പാക്കുന്നതിൽ സാങ്കേതിക വിദ്യയുടെ സഹായത്തോടെയും അടിസ്ഥാന സൗകര്യങ്ങൾ മെച്ചപ്പെടുത്തിയും ശ്രദ്ധേയമായ നേട്ടങ്ങളാണ് ഇക്കാലയളവിൽ കൈവരിച്ചത്.

എറണാകുളം സെൻട്രൽ ലബോറട്ടറിയിൽ പുതിയ കാലിബറേഷൻ ലാബുകൾ ആരംഭിച്ചത് ഇതിൽ പ്രധാനമാണ്. തെർമോമീറ്റർ കാലിബറേഷൻ ലബോറട്ടറി, ഫ്‌ളോമീറ്റർ കാലിബറേഷൻ ലബോറട്ടറി, സ്പിഗ്മോമാനോമീറ്റർ കാലിബറേഷൻ ലബോറട്ടറി, വാട്ടർ മീറ്റർ കാലിബറേഷൻ ലബോറട്ടറി എന്നിവയുടെ പ്രവർത്തനം ആരംഭിച്ചത് ഈരംഗത്ത് വലിയ മുതൽക്കൂട്ടാണ്.എറണാകുളത്ത് ഗോൾഡ് അസ്സെയിങ് ലാബിന് എൻ.എ.ബി.എൽ അക്രഡിറ്റേഷൻ ലഭ്യമാക്കാനുള്ള നടപടികൾ അന്തിമഘട്ടത്തിലാണ്. ഇത് സ്വർണ്ണത്തിന്റെ പരിശുദ്ധി ഉറപ്പാക്കൽ നടപടികൾ കൂടുതൽ കാര്യക്ഷമമാക്കാൻ സഹായിക്കും. കൂടാതെ, എറണാകുളം കാക്കനാട് ലീഗൽ മെട്രോളജി ഭവനിൽ അനർട്ട് മുഖേന സ്ഥാപിച്ച സോളാർ പവർ പ്ലാന്റ് പ്രവർത്തനസജ്ജമാക്കി.

പൊതുജനങ്ങൾക്ക് വകുപ്പിന്റെ സേവനങ്ങൾ വേഗത്തിൽ ലഭ്യമാക്കാൻ ‘സുതാര്യം’ മൊബൈൽ ആപ്ലിക്കേഷൻ നവീകരിച്ച് പുറത്തിറക്കി. ഇതിലൂടെ ജനങ്ങൾക്ക് ഓഫീസുകൾ തിരഞ്ഞെടുത്ത് പരാതികൾ അയക്കാനും പുരോഗതി തത്സമയം അറിയാനും സാധിക്കും.

വ്യാപാരികളുടെ അളവ് തൂക്ക ഉപകരണങ്ങൾ മുദ്ര ചെയ്യാനുള്ള നടപടികൾ ലളിതമാക്കിക്കൊണ്ട് ഓൺലൈൻ സോഫ്റ്റ് വെയർ മൊഡ്യൂൾ (LMOMS VERIFICATION MODULE) ആരംഭിച്ചു. ഇതിലൂടെ വ്യാപാരികൾക്ക് അളവ് തൂക്ക ഉപകരണങ്ങൾ മുദ്ര ചെയ്യാനുള്ള അപേക്ഷകളും ഫീസും ഓൺലൈനായി സമർപ്പിക്കാനും, മുദ്ര ചെയ്ത ശേഷമുള്ള സർട്ടിഫിക്കറ്റുകൾ ഡൗൺലോഡ് ചെയ്യാനും ഓഫീസിൽ നേരിട്ട് പോകാതെ സാധിക്കുന്നു. ഇത് വ്യാപാരികളുടെ സമയവും അധ്വാനവും ലാഭിക്കാൻ സഹായിക്കുന്ന വലിയൊരു കാൽവെപ്പാണ്.

വ്യാപാരസ്ഥാപനങ്ങളിലെ ന്യൂനതകൾ കണ്ടെത്തി പരിഹരിക്കാനായി ‘ജാഗ്രത’ പദ്ധതിയും, പെട്രോൾ/ഡീസൽ ബങ്കുകളിലെ കൃത്യത ഉറപ്പാക്കാൻ ‘ക്ഷമത’ പദ്ധതിയും വിജയകരമായി നടപ്പാക്കി. ഈ പദ്ധതികൾ ഉപഭോക്താക്കൾക്ക് ശരിയായ അളവും തൂക്കവും ഉറപ്പാക്കാൻ സഹായിച്ചു.

സംസ്ഥാനത്തുടനീളം ലീഗൽ മെട്രോളജി വകുപ്പിന്റെ ഓഫീസുകൾക്ക് മികച്ച സൗകര്യങ്ങൾ ഒരുക്കുന്നതിന്റെ ഭാഗമായി, കോട്ടയം, കാസർഗോഡ്, വയനാട് ലീഗൽ മെട്രോളജി ജില്ലാ ഓഫീസുകളുടെ നിർമ്മാണ പ്രവർത്തനങ്ങൾ അന്തിമഘട്ടത്തിലാണ്. പാലക്കാട് ജില്ലയിലും നിർമ്മാണ പ്രവർത്തനങ്ങൾ ആരംഭിച്ചു. കാര്യക്ഷമതയുടെ ഒരു പുതിയ അധ്യായമാണ് വകുപ്പിൽ ഇതിലൂടെ തുറക്കുന്നത്.

കരുത്തോടെ കേരളം- 69