കേരള ഭാഷാ ഇൻസ്റ്റിറ്റ്യൂട്ട് വായനവാരം മത്സരവിജയികളെ പ്രഖ്യാപിച്ചു

കേരള ഭാഷാ ഇൻസ്റ്റിറ്റ്യൂട്ടിന്റെ വായനവാരം സമാപനസമ്മേളനം ഉദ്ഘാടനവും ഉപന്യാസരചന, പ്രസംഗമത്സരവിജയികൾക്കുള്ള സമ്മാനവിതരണവും ജൂൺ 25 ന് 3 മണിക്ക് തിരുവനന്തപുരം എൻ. വി. ഹാളിൽ പ്രമുഖ നോവലിസ്റ്റ് കെ. വി. മോഹൻകുമാർ നിർവഹിക്കും. വിദ്യാർഥികൾക്കായി ഇൻസ്റ്റിറ്റ്യൂട്ടിൽ സംഘടിപ്പിച്ച ‘വൈജ്ഞാനികസമൂഹവും നവകേരളനിർമിതിയും’ എന്ന വിഷയത്തിലെ ഉപന്യാസരചനയിലും, ലഹരിയുടെയും സൈബർ വിപ്ലവത്തിന്റെയും കാലത്ത് യുവതയുടെ പുനർവായന എന്ന വിഷയത്തിലെ പ്രസംഗമത്സരത്തിലും വിജയികളായ ഒന്നും രണ്ടും മൂന്നും സ്ഥാനക്കാർക്ക് യഥാക്രമം 5000, 3000, 2000 രൂപ വീതവും സാക്ഷ്യപത്രവും ചടങ്ങിൽ വിതരണം ചെയ്യും. ഡയറക്ടർ ഡോ. എം. സത്യൻ ആധ്യക്ഷ്യം വഹിക്കും. പബ്ലിക്കേഷൻ വിഭാഗം അസി. ഡയറക്ടർ സുജ ചന്ദ്ര പി, പി. ആർ. ഒ. റാഫി പൂക്കോം, മനേഷ് പി. എന്നിവർ സംസാരിക്കും.

വായനവാരം പ്രസംഗമത്സരം വിജയികൾ- : അനു പൗലോസ് (എം.എ. പൊളിറ്റിക്കൽ സയൻസ്, കേരള സർവകലാശാല, കാര്യവട്ടം ക്യാമ്പസ്), സോജു സി. ജോസ് (ബി.എസ്.സി. ഫിസിക്‌സ്, യൂണിവേഴ്‌സിറ്റി കോളെജ്, തിരുവനന്തപുരം), സ്‌നേഹ പോൾ (ബി.എ. ഇക്കണോമിക്‌സ്, മാർ ഇവാനിയോസ് കോളെജ്, തിരുവനന്തപുരം) എന്നിവരാണ് യഥാക്രമം ഒന്നും രണ്ടും മൂന്നും സ്ഥാനക്കാർ.

ഉപന്യാസരചന മത്സരവിജയികൾ- ശിവപ്രിയ (എം.എ. മലയാളം ശ്രീശങ്കരാചാര്യ സംസ്‌കൃത സർവകലാശാല, കാലടി), ആര്യ സുരേഷ് (എം.എ. കേരള പഠനവിഭാഗം, കേരള സർവകലാശാല കാര്യവട്ടം ക്യാമ്പസ്), ജോസ്‌ന ജെ.എസ്. (ഗവേഷക, മലയാളവിഭാഗം, എൻ.എസ്.എസ്. കോളെജ്, നിലമേൽ) എന്നിവരാണ് യഥാക്രമം ഒന്നും രണ്ടും മൂന്നും സ്ഥാനക്കാർ.