കള്ളാടി മണ്ണിടിച്ചില്‍; ഒരു മൃതദേഹം കൂടി കണ്ടെത്തി; മരണം ഏഴായി

വയനാട് കള്ളാടി തുരങ്കപ്പാത നിർമ്മാണ മേഖലയിലുണ്ടായ മണ്ണടിച്ചിൽ ദുരന്തത്തിൽ മരിച്ചവരുടെ എണ്ണം ഏഴായി ഉയർന്നു. ഇന്ന് രാവിലെ മീനാക്ഷി പുഴയിൽ നടത്തിയ തിരച്ചിലിലാണ് ഒരാളുടെ മൃതദേഹം കൂടി കണ്ടെടുത്തത്. അപകടത്തിൽ കാണാതായ ഇനി ഒരാൾക്ക് വേണ്ടിയുള്ള തിരച്ചിൽ പ്രദേശത്ത് ഊർജ്ജിതമായി തുടരുകയാണ്. ദുരന്തത്തിൽ പരുക്കേറ്റ ഏഴുപേർ നിലവിൽ വിവിധ ആശുപത്രികളിൽ ചികിത്സയിൽ കഴിയുന്നുണ്ട്. കള്ളാടി അപകടവുമായി ബന്ധപ്പെട്ട വസ്തുതാന്വേഷണ റിപ്പോർട്ട് സർക്കാർ ഇന്ന് ഹൈക്കോടതിയിൽ സമർപ്പിക്കും. വയനാട് ഉൾപ്പെടെ അഞ്ച് ജില്ലകളിൽ ഇന്ന് യെല്ലോ അലർട്ട് പ്രഖ്യാപിച്ചിട്ടുണ്ട്.

എൻഡിആർഎഫിന്റെയും ഫയർഫോഴ്സിന്റെയും 30 അംഗ സംയുക്ത സംഘമാണ് ഇന്ന് പുഴയിൽ തിരച്ചിൽ നടത്തുന്നതെന്ന് റവന്യൂമന്ത്രി എ.പി. അനിൽകുമാർ അറിയിച്ചു. ഇതിന് പുറമെ മുൻപ് ചൂരൽമലയിൽ രക്ഷാപ്രവർത്തനം നടത്തി പരിചയമുള്ള തുർക്കി ജീവൻ രക്ഷാസമിതി കൂടി തിരച്ചിലിനായി എത്തും. അപകടസ്ഥലത്ത് റോഡിന് ഇരുവശവും കൂടിക്കിടക്കുന്ന മണ്ണ് ചൂരൽമലയിലേക്ക് മാറ്റാനാണ് ആലോചിക്കുന്നതെങ്കിലും, മണ്ണ് മാറ്റുന്നത് കൂടുതൽ മണ്ണിടിച്ചിലിന് കാരണമാകുമെന്ന ആശങ്കയുള്ളതിനാൽ വിദഗ്ധ അഭിപ്രായം തേടിയ ശേഷമേ അന്തിമ തീരുമാനം എടുക്കൂ എന്ന് മന്ത്രി വ്യക്തമാക്കി. മണ്ണ് മാറ്റാൻ ആകില്ലെന്ന് കൊങ്കൺ റെയിൽവേ സർക്കാരിനെ അറിയിച്ചിട്ടുണ്ട്. വിഷയത്തിൽ പഠനം നടത്തി റിപ്പോർട്ട് സമർപ്പിക്കാനുള്ള വിദഗ്ധ സമിതിയെ സർക്കാർ ഇന്ന് തന്നെ പ്രഖ്യാപിച്ചേക്കും.