ജൂനിയർ ഏഷ്യാ കപ്പ് ഹോക്കി കിരീടം ഇന്ത്യക്ക്; പരിശീലക വേഷത്തിൽ ശ്രീജേഷിന് മിന്നും തുടക്കം

ജൂനിയർ ഏഷ്യാ കപ്പ് ഹോക്കിയിലെ അപരാജിത കുതിപ്പ് തുടർന്ന് കലാശപ്പോരിൽ ബദ്ധവൈരികളായ പാക്കിസ്ഥാനെയും വീഴ്ത്തി ഇന്ത്യയ്ക്ക് കിരീടം. ആവേശകരമായ മത്സരത്തിൽ പിന്നിൽനിന്ന് തിരിച്ചടിച്ച് 5–3നാണ് ഇന്ത്യ പാക്കിസ്ഥാനെ തോൽപ്പിച്ചത്. ഹാട്രിക് ഉൾപ്പെടെ നാലു ഗോളുകളുമായി മിന്നിത്തിളങ്ങിയ അരയ്ജീത് സിങ് ഹുൻഡലാണ് ഇന്ത്യയ്ക്ക് തകർപ്പൻ വിജയം സമ്മാനിച്ചത്. ഒളിംപിക്സ് വേദിയിൽ ഉൾപ്പെടെ ഇന്ത്യൻ ഗോൾവല കാത്ത് രാജ്യത്തിന്റെ യശസുയർത്തിയ പി.ആർ. ശ്രീജേഷിന് പരിശീലക വേഷത്തിലും മിന്നുന്ന തുടക്കം.

4, 18, 47, 54 മിനിറ്റുകളിലായിരുന്നു അരയ്ജീത് സിങ്ങിന്റെ ഗോളുകൾ. ഇതിൽ മൂന്നാം ഗോളൊഴികെയുള്ള ഗോളുകളെല്ലാം പെനൽറ്റി കോർണറുകളിൽ നിന്നായിരുന്നു. ഒരു ഗോൾ ദിൽരാജ് സിങ്ങിന്റെ (19–ാം മിനിറ്റ്) വകയാണ്. പാക്കിസ്ഥാനായി സൂഫിയാൻ ഖാൻ ഇരട്ടഗോവ്‍ നേടി. 30 (പെനൽറ്റി കോർണർ), 39 മിനിറ്റുകളിലായിരുന്നു സൂഫിയാന്റെ ഗോളുകൾ. ഒരു ഗോൾ ഹനാൻ ഷാഹിദ് (മൂന്നാം മിനിറ്റ്) നേടി.