നോർക്ക റൂട്സ് ഡയറക്ടറും പ്രമുഖ പ്രവാസി വ്യവസായിയും ലോക കേരള സഭ അംഗവുമായ ഡോ. എം അനിരുദ്ധൻ അന്തരിച്ചു

നോർക്ക റൂട്സ് ഡയറക്ടറും പ്രമുഖ പ്രവാസി വ്യവസായിയും ലോക കേരള സഭ അംഗവും അമേരിക്കൻ മലയാളികളുടെ സംഘടനയായ ഫൊക്കാനയുടെ പ്രഥമ പ്രസിഡൻ്റുമായ ഡോ. എം അനിരുദ്ധന്റെ നിര്യാണത്തിൽ ലോക കേരള സഭ സെക്രട്ടറിയേറ്റ് അനുശോചനം രേഖപ്പെടുത്തി. രോഗ ബാധിതനായി ചികിത്സയിലിരിക്കെയാണ് നിര്യാണം.

ഓച്ചിറ സ്വദേശിയായ ഡോ.അനിരുദ്ധൻ രസതന്ത്രത്തിൽ ഗവേഷണത്തിനായാണ് 1973-ൽ അമേരിക്കയിലേക്ക് കുടിയേറിയത്. ടെക്‌സസിലെ എ. ആൻഡ് എം. സർവകലാശാലയിൽ ന്യൂക്ലിയർ കെമിസ്ട്രി അധ്യാപകനായിരിക്കെ ന്യൂട്രീഷ്യൻ മേഖലയിലേക്ക് തിരിഞ്ഞു. തുടർന്ന് ലോകത്തിലെ ഏറ്റവും വലിയ പോഷകാഹാര ഉത്പാദകരായ സാൻഡോസിൻ്റെ ഗവേഷണവിഭാഗം തലവനായി പ്രവർത്തിച്ചു. പിന്നീടാണ് സ്വന്തമായി വ്യവസായ ശൃംഖല വികസിപ്പിച്ചെടുക്കുന്നത്. പോഷക ഗവേഷണ, ഉത്പാദന രംഗത്തും പ്രവാസി ഇന്ത്യക്കാരുടെ സാമൂഹികക്ഷേമത്തിനും നൽകിയ സംഭാവനകൾ പരിഗണിച്ച് അനിരുദ്ധന് പ്രവാസി ഭാരതീയ സമ്മാൻ പുരസ്‌കാരം ലഭിച്ചിട്ടുണ്ട്.

അമേരിക്കയിലെ മലയാളി കൂട്ടായ്‌മയായ 'ഫൊക്കാന'യ്ക്ക് രൂപം നൽകിയത് ഡോ. എം അനിരുദ്ധനായിരുന്നു . അമേരിക്കയിലെ നാഷണൽ ഫുഡ് പ്രൊസസേഴ്‌സ് അസോസിയേഷൻ മികച്ച ആർ. ആൻഡ് ഡി. ശാസ്ത്രജ്ഞനുള്ള പുരസ്‌കാരം നൽകി ആദരിച്ചിരുന്നു.

ലോക കേരള സഭയുടെ പ്രവർത്തങ്ങളിൽ സജീവ സാന്നിധ്യമായിരുന്ന ഡോ. എം അനിരുദ്ധൻ അമേരിക്കയിൽ ലോക കേരള സഭ മേഖല സമ്മേളനം വിജയകരമായി സംഘടിപ്പിക്കുന്നതിനു നേതൃത്വം നൽകി.