ഡിജിറ്റൽ റീ സർവെ മൂന്നാംഘട്ടം: സംസ്ഥാനതല ഉദ്ഘാടനം 14ന്

സംസ്ഥാനത്തെ സർവെ- ഭൂരേഖ പരിപാലന രംഗത്ത് വിപ്ലവകരമായ മാറ്റങ്ങൾ സൃഷ്ടിച്ച ഡിജിറ്റൽ റീ സർവെ പ്രവർത്തനങ്ങളുടെ മൂന്നാംഘട്ടം സംസ്ഥാനതല ഉദ്ഘാടനം ഫെബ്രുവരി 14ന് രാവിലെ 10:30ന് കൊല്ലം ചാത്തന്നൂർ ചിറക്കര ഇ.എ.കെ. കൺവെൻഷൻ സെന്ററിൽ റവന്യൂ മന്ത്രി കെ.രാജൻ നിർവഹിക്കും. ധനമന്ത്രി കെ എൻ ബാലഗോപാൽ അധ്യക്ഷത വഹിക്കുന്ന ചടങ്ങിൽ മൃഗസംരക്ഷണ വകുപ്പ് മന്ത്രി ജെ. ചിഞ്ചുറാണി, എൻ.കെ. പ്രേമചന്ദ്രൻ എം.പി. എന്നിവർ വിശിഷ്ടാതിഥികളാകും. എം.എൽ.എമാരായ പി.എസ്. സുപാൽ, എം. നൗഷാദ്, കോവൂർ കുഞ്ഞുമോൻ, പി.സി. വിഷ്ണു.നാഥ്, എം. മുകേഷ്, ഡോ. സുജിത് വിജയൻ പിള്ള, സി.ആർ. മഹേഷ്, ജില്ലാപഞ്ചായത്ത് പ്രസിഡണ്ട് ഡോ. പി.കെ. ഗോപൻ തുടങ്ങിയവർ പങ്കെടുക്കും. ജി.എസ്. ജയലാൽ എം.എൽ.എ സ്വാഗതവും ജില്ലാ കളക്ടർ എൻ. ദേവീദാസ് നന്ദിയും പറയും. സർവെ ഭൂരേഖ വകുപ്പ് ഡയറക്ടർ സീറാം സാംബശിവ റാവു പദ്ധതി വിശദീകരിക്കും.

കേരളത്തെ കൃത്യതയോടെയും ശാസ്ത്രീയമായും അളക്കുന്നതിനും ഭാവി കേരളത്തിന്റെ വികസന ആവശ്യങ്ങൾക്കായി ഭൂവിവരങ്ങൾ ഉപയോഗപ്പെടുത്തുന്നതിനുമായി ആരംഭിച്ച ഡിജിറ്റൽ റീ സർവെ പ്രവർത്തനങ്ങളിൽ ഗണ്യമായ പുരോഗതിയുണ്ടായി. രണ്ടു ഘട്ടങ്ങളിലായി നടന്നു വരുന്ന ഡിജിറ്റൽ റീ സർവെയിൽ ഇതുവരെ ആറ് ലക്ഷം ഹെക്ടർ ഭൂമിയലധികം അളന്നു കഴിഞ്ഞു. ഒന്നാം ഘട്ടത്തിൽ സർവെ ആരംഭിച്ച 200 വില്ലേജുകളിലെയും രണ്ടാം ഘട്ടത്തിൽ സർവെ ആരംഭിച്ച 203 വില്ലേജുകളിലെ 47 വില്ലേജുകളിലെയും സർവെ പൂർത്തീകരിച്ച് സർവെ അതിരടയാള നിയമത്തിലെ 9 (2) പ്രഖ്യാപനം പ്രസിദ്ധീകരിച്ചു. ഒന്നും രണ്ടും ഘട്ടങ്ങളിലായി 44.54 ലക്ഷം ലാൻഡ് പാർസലുകളാണ് അളവ് പൂർത്തിയാക്കിയത്.