തിരുവനന്തപുരം കോർപ്പറേഷനിൽ ബിജെപിയ്ക്ക് തിരിച്ചടി; 20 കൗൺസിലർമാരുടെ സത്യപ്രതിജ്ഞ അസാധുവാക്കി ഹൈക്കോടതി

ദൈവങ്ങളുടെയും രാഷ്ട്രീയ നേതാക്കളുടെയും ബലിദാനികളുടെയും പേരെടുത്ത് പറഞ്ഞ് നിയമപരമായ മാതൃക ലംഘിച്ച് സത്യപ്രതിജ്ഞ ചെയ്ത ജനപ്രതിനിധികൾക്ക് കേരള ഹൈക്കോടതിയുടെ ശക്തമായ തിരിച്ചടി. തിരുവനന്തപുരം കോർപ്പറേഷനിലെ 20 ബിജെപി കൗൺസിലർമാരുടെയും പാലക്കാട് വടക്കഞ്ചേരി ഗ്രാമപഞ്ചായത്തിലെ കോൺഗ്രസ് അംഗത്തിന്റെയും സത്യപ്രതിജ്ഞ ഹൈക്കോടതി അസാധുവാക്കി. ജസ്റ്റിസ് പി. വി. കുഞ്ഞികൃഷ്ണന്റെ ബെഞ്ചാണ് നിയമപരമായ വ്യവസ്ഥകൾ ലംഘിച്ചുള്ള ഈ സത്യപ്രതിജ്ഞകൾ റദ്ദാക്കിക്കൊണ്ട് നിർണായക വിധി പുറപ്പെടുവിച്ചത്. വിധി വന്ന് നാലാഴ്ചയ്ക്കകം ഇവർ നിയമപ്രകാരം വീണ്ടും സത്യപ്രതിജ്ഞ ചെയ്യണമെന്നും ഹൈക്കോടതി നിർദ്ദേശിച്ചു.

തിരുവനന്തപുരം കോർപ്പറേഷനിലെ ബിജെപി അംഗങ്ങൾക്കെതിരെ സിപിഐഎം കൗൺസിലറായ എസ്. പി. ദീപക് സമർപ്പിച്ച ഹർജിയിലാണ് കോടതിയുടെ ആദ്യ ഉത്തരവ്. ബിജെപി കൗൺസിലർമാർ നിശ്ചിത മാതൃകയ്ക്ക് വിരുദ്ധമായി 'ഗുരുദേവ നാമത്തിൽ, ഉദിയന്നൂർ ദേവിയുടെ നാമത്തിൽ, കാവിലമ്മയുടെ നാമത്തിൽ, ഭഗവത് നാമത്തിൽ, ശ്രീപത്മനാഭ സ്വാമിയുടെ നാമത്തിൽ, ഭാരതാംബയുടെ നാമത്തിൽ, തന്റെ പ്രസ്ഥാനത്തിലെ ബലിദാനികളുടെ പേരിൽ, ഭാരത മാതാവിന്റെ നാമത്തിൽ, തിരുവല്ലം പരശുരാമന്റെ നാമത്തിൽ, ആറ്റുകാൽ അമ്മയുടെ നാമത്തിൽ, ശ്രീ ഇരുംകുളങ്ങര ദുർഗ ഭഗവതിയുടെ നാമത്തിൽ, പത്മനാഭന്റേയും ശ്രീ മഹാവിഷ്ണുവിന്റെയും നാമത്തിൽ, ശ്രീകണ്‌ഠേശ്വരൻ അമ്മയപ്പൻ നാമത്തിൽ, അയ്യപ്പ നാമത്തിൽ, കാര്യവട്ടം ശ്രീ ധർമ്മ ശാസ്താവിന്റെ നാമത്തിൽ' എന്നിങ്ങനെ വിവിധ ദൈവങ്ങളുടെയും രാഷ്ട്രീയ ബലിദാനികളുടെയും പേരുകൾ എടുത്തുപറഞ്ഞ് സത്യപ്രതിജ്ഞ ചെയ്തത് ജനാധിപത്യവിരുദ്ധവും ഭരണഘടനാ വിരുദ്ധവുമാണെന്നായിരുന്നു ഹർജിയിലെ പ്രധാന ആരോപണം.

ഇതിന് സമാനമായി പാലക്കാട് വടക്കഞ്ചേരി ഗ്രാമപഞ്ചായത്തിലെ കോൺഗ്രസ് അംഗം സുനിൽ ചുവട്ടുപാടത്തിന്റെ സത്യപ്രതിജ്ഞയും ഹൈക്കോടതി റദ്ദാക്കിയിട്ടുണ്ട്. മുൻ മുഖ്യമന്ത്രിയും അന്തരിച്ച കോൺഗ്രസ് നേതാവുമായ ഉമ്മൻചാണ്ടിയുടെ പേരിൽ സത്യപ്രതിജ്ഞ ചെയ്തതിനെതിരെയാണ് കോടതിയുടെ ഈ നടപടി.

സാധാരണയായി ജനപ്രതിനിധികൾ സത്യപ്രതിജ്ഞ ചെയ്യുമ്പോൾ ഒന്നുകിൽ 'ദൈവനാമത്തിൽ' അല്ലെങ്കിൽ 'ഭരണഘടനാപരമായി ദൃഢപ്രതിജ്ഞ' എന്നിവയാണ് ഔദ്യോഗികമായി ഉപയോഗിക്കേണ്ടത്. ഇതിന് വിരുദ്ധമായി വ്യക്തികളുടെയോ പ്രത്യേക സങ്കൽപ്പങ്ങളുടെയോ പേര് ഉപയോഗിക്കുന്നത് നിയമവിരുദ്ധമാണെന്ന് കോടതി ചൂണ്ടിക്കാട്ടി. അതേസമയം, നിലവിൽ സത്യപ്രതിജ്ഞ അസാധുവാക്കപ്പെട്ടെങ്കിലും കൗൺസിലർമാരും പഞ്ചായത്ത് അംഗവും എന്ന നിലയിൽ ഇവർ ഇതുവരെ തദ്ദേശ സ്ഥാപനങ്ങളിൽ ചെയ്ത പ്രവർത്തനങ്ങൾക്കും എടുത്ത തീരുമാനങ്ങൾക്കും മുൻസിപ്പാലിറ്റി-പഞ്ചായത്ത് നിയമപ്രകാരം നിയമപരമായ സംരക്ഷണമുണ്ടായിരിക്കുമെന്നും ഹൈക്കോടതി ഉത്തരവിൽ വ്യക്തമാക്കുന്നു.