പണം വാങ്ങി കര്ണാടകയില്നിന്ന് കേരളത്തിലേക്കു മനുഷ്യക്കടത്ത്; കര്ശന നടപടി
തിരുവനന്തപുരം: ലോക്ക്ഡൗണ് നിലനില്ക്കുന്നതിനാല് കേരളത്തിലേക്കു മറ്റു സംസ്ഥാനങ്ങളില്നിന്ന് മനുഷ്യക്കടത്ത് നടക്കുന്നുണ്ടെന്നും ഇതിനെതിരേ കര്ശനമായ നടപടി സ്വീകരിക്കുമെന്നും മുഖ്യമന്ത്രി പിണറായി വിജയന്. ആളെ കൊണ്ടുവരുന്നതിന് ചിലര് കരാര് ഏറ്റെടുത്ത് പ്രവര്ത്തിക്കുന്നതായും കര്ണാടകയില്നിന്ന് പണം വാങ്ങി ആളുകളെ എത്തിക്കുന്നതായും ശ്രദ്ധയില്പ്പെട്ടു. ഇക്കാര്യത്തില് കര്ക്കശമായ നടപടി സ്വീകരിക്കാന് പോലീസിനു നിര്ദേശം നല്കി. തമിഴ്നാട് കര്ണാടക അതിര്ത്തി മേഖലകളില് ആളുകള് ഇരുവശങ്ങളിലേക്കും കടക്കുന്നത് തടയാന് കര്ശന നടപടി സ്വീകരിക്കുമെന്നും മുഖ്യമന്ത്രി അറിയിച്ചു. മെഡിക്കല് ആവശ്യങ്ങള് ഉള്പ്പെടെയലുള്ള അത്യാവശ്യങ്ങള്ക്കു വേണ്ടി ജില്ല കടക്കുന്നവര് ജില്ലാ പോലീസ് ആസ്ഥാനത്തുനിന്നോ പോലീസ് മേധാവിയോടോ പാസ് നേടണം. അത്തരക്കാര്ക്കു മാത്രമേ ജില്ല കടക്കാന് അനുമതിയുള്ളുവെന്നും മുഖ്യമന്ത്രി വ്യക്തമാക്കി.
നിലവിലെ സാഹചര്യത്തില് അന്തര്സംസ്ഥാന യാത്ര സാധ്യമല്ല. എല്ലാവര്ക്കും ആവശ്യങ്ങളുണ്ട്. എന്നുവച്ച് ലോക്ക്ഡൗണ് ലംഘിക്കാനാവില്ല. അതുകൊണ്ടുതന്നെ അനധികൃത യാത്രകള് തടയുമെന്നും മുഖ്യമന്ത്രി അറിയിച്ചു.