ജലീലിനെതിരെ പ്രതിഷേധം; കൊല്ലത്തും കണ്ണൂരും സംഘര്ഷം
കോട്ടയം: മന്ത്രി ജലീലിന്റെ രാജി ആവശ്യപ്പെട്ട് കൊല്ലത്തും കണ്ണൂരും യുവമോര്ച്ച, മഹിള മോര്ച്ച പ്രവര്ത്തകരുടെ നേതൃത്വത്തില് നടന്ന മാര്ച്ചില് സംഘര്ഷം. കൊല്ലത്ത് യുവമോര്ച്ചയുടെ നേതൃത്വത്തില് കളക്ടറേറ്റിലേക്കാണ് മാര്ച്ച് നടത്തിയത്.
പോലീസ് ബാരിക്കേഡ് തകര്ക്കാന് ശ്രമിച്ച പ്രവര്ത്തകര്ക്ക് നേരെ പോലീസ് ജലപീരങ്കിയും ഗ്രനേഡും പ്രയോഗിച്ചു. പ്രവര്ത്തകര് പിരിഞ്ഞു പോകാന് തയാറാകാത്തതിനെ തുടര്ന്ന് പോലീസ് കണ്ണീര് വാതകവും പ്രയോഗിച്ചു. യുവമോര്ച്ച സംസ്ഥാന അധ്യക്ഷന് ഉള്പ്പടെയുള്ള നേതാക്കള് സ്ഥലത്തെത്തിയിരുന്നു. പരിക്കേറ്റ പ്രവര്ത്തകരെ പോലീസ് വാഹനത്തില് ആശുപത്രിയിലേക്കു മാറ്റി.
കണ്ണൂരില് മഹിള മോര്ച്ചയുടെ നേതൃത്വത്തില് കളക്ടറേറ്റിലേക്ക് നടത്തിയ മാര്ച്ചും സംഘര്ഷത്തില് കലാശിച്ചു. ബാരിക്കേഡിനു മുകളില് കയറിയ പ്രവര്ത്തകര് ജലപീരങ്കി പ്രയോഗിച്ചപ്പോള് നിലത്ത് വീണ് പരിക്കേറ്റു. ജലപീരങ്കിയുടെ വാഹനത്തിലെ ഡ്രൈവറെ മര്ദ്ദിക്കാനും വാഹനം തകര്ക്കാനും പ്രവര്ത്തകര് ശ്രമിച്ചു. തുടര്ന്ന് ബിജെപി പ്രവര്ത്തകരും സ്ഥലത്തെത്തി. പരിക്കേറ്റ് പ്രവര്ത്തകരെ ആശുപത്രിയിലേക്കു മാറ്റി.