ലോക്ക്‌ഡൗണില്‍ ഇളവുകള്‍ പ്രഖ്യാപിച്ച സാഹചര്യത്തില്‍ കൂടുതല്‍ കരുതലോടെ മുന്നോട്ട് പോകണമെന്ന് പ്രധാനമന്ത്രി

Ajith.A

31 May 2020 11:55 AM

​​​​​​ന്യൂഡല്‍ഹി: ലോക്ക്‌ഡൗണില്‍ ഇളവുകള്‍ പ്രഖ്യാപിച്ച സാഹചര്യത്തില്‍ കൂടുതല്‍ കരുതലോടെ മുന്നോട്ട് പോകണമെന്ന് പ്രധാനമന്ത്രി നരേന്ദ്രമോദി. മന്‍ കീ ബാത്ത് വഴി രാജ്യത്തെ ജനങ്ങളെ അഭിസംബോധന ചെയ്ത് സംസാരിക്കുകയായിരുന്നു അദേഹം. ജനസംഖ്യ കൂടുതലായിട്ടും ഇന്ത്യയില്‍ കൊവിഡിനെ പ്രതിരോധിക്കാനായി. സാമ്പത്തികരംഗത്തെ തിരിച്ചുപിടിക്കാനുള്ള ശ്രമങ്ങള്‍ നടന്നുകൊണ്ടിരിക്കുകയാണെന്ന് പറഞ്ഞ അദേഹം ആഗോളതലത്തിലേത് പോലെ രാജ്യത്ത് രോഗവ്യാപനമുണ്ടായില്ലെന്നും പറഞ്ഞു.

കൊവിഡിനെതിരായ പോരാട്ടം തുടരണമെന്ന് പറഞ്ഞ അദേഹം രാജ്യത്തിന് മുന്നിലുള്ളത് പലതരം വെല്ലുവിളികളാണെന്നും പറഞ്ഞു. സാധാരണക്കാര്‍ ഒട്ടേറെ ത്യാഗങ്ങള്‍ സഹിച്ചു. പരസ്പരം സഹായിക്കാന്‍ ജനങ്ങള്‍ മുന്നിട്ടിറങ്ങി. പോരാട്ടത്തില്‍ അണിചേര്‍ന്ന എല്ലാവര്‍ക്കും നന്ദിയറിയിച്ച അദേഹം പുതിയ മാര്‍ഗങ്ങളിലൂടെ പ്രതിരോധം തുടരണമെന്നും പറഞ്ഞു.

ഓണ്‍ലൈന്‍ പഠനങ്ങള്‍ അടക്കമുള്ള പുതിയ മാര്‍ഗങ്ങള്‍ രാജ്യം തേടുകയാണ്. ഒട്ടേറെ പ്രതിസന്ധികള്‍ നേരിടേണ്ടി വരും. കൊവിഡിനെതിരായ പോരാട്ടം നീണ്ടുനില്‍ക്കുന്നതാണ്. സമൂഹത്തിലെ എല്ലാ വിഭാഗം ജനങ്ങളെയും കൊവിഡ് ബാധിച്ചിട്ടുണ്ട്. രാജ്യം കുടിയേറ്റ തൊഴിലാളികള്‍ക്കൊപ്പമുണ്ട്. റെയില്‍വെ ജീവനക്കാര്‍ ഉള്‍പ്പെടെയുള്ളവര്‍ കൊവിഡ് പ്രതിരോധ പ്രവര്‍ത്തനങ്ങളില്‍ ശക്തമായി പ്രവര്‍ത്തിച്ചു.പ്രതിസന്ധി സമസ്ത മേഖലകളെയും ബാധിച്ചതായും പ്രധാനമന്ത്രി ചൂണ്ടിക്കാട്ടി.

രാജ്യത്തെ പാവപ്പെട്ടവരുടെ ദുരിതം വര്‍ദ്ധിച്ചു. കൊവിഡിനെ നേരിടാന്‍ പുതിയ വഴികള്‍ തേടണം. രാജ്യം സ്വയംപര്യാപ്തത നേടുകയാണ്. ജനങ്ങള്‍ സ്വദേശി ഉത്പനങ്ങള്‍ വാങ്ങാന്‍ തുടങ്ങി. ആയുര്‍വേദത്തിന് സമൂഹത്തില്‍ പ്രസക്തി വര്‍ദ്ധിച്ചു. യോഗയും ആയുര്‍വേദവും ലോകം ഏറ്റെടുത്തു. ഒട്ടേറെ ലോകനേതാക്കളുമായി താന്‍ സംസാരിച്ചെന്ന് പറഞ്ഞ പ്രധാനമന്ത്രി കൊവിഡിനെ പ്രതിരോധിക്കാന്‍ യോഗയും മുഖ്യപങ്ക് വഹിച്ചതായി പറഞ്ഞു.

ആയുഷ്‌മാന്‍ ഭാരത് രാജ്യത്തെ വിപ്ലവകരമായ പദ്ധതിയാണ്. തൊഴിലാളികളെ ശക്തിപ്പെടുത്തേണ്ടാണ് രാജ്യത്തിന് ആവശ്യമാണ്. ശാക്തീകരണം വികസനത്തിന് അനിവാര്യമാണ്. ഒരു കോടി ജനങ്ങള്‍ക്ക് സൗജന്യ ചികിത്സ ഉറപ്പാക്കാന്‍ സര്‍ക്കാരിന് കഴിഞ്ഞു. ഗ്രാമീണര്‍ക്ക് പ്രത്യേക ചികിത്സ പദ്ധതി ഏര്‍പ്പെടുത്തിയെന്നും വെട്ടുകിളി ആക്രമണം രാജ്യത്തെ കര്‍ഷകര്‍ക്ക് ഭീഷണിയാണെന്നും അദേഹം പറഞ്ഞു.

മഴവെള്ളം സംഭരിക്കുന്നതിനുള്ള നടപടികള്‍ സ്വീകരിക്കണമെന്ന് പറഞ്ഞ അദേഹം ബംഗാള്‍ നേരിടുന്ന പ്രതിസന്ധിയില്‍ രാജ്യം ഒപ്പമുണ്ടെന്നും പറഞ്ഞു. ചുഴലിക്കാറ്റ് തകര്‍ത്ത ബംഗാളിന് ആവശ്യമായ സഹായം നല്‍കുമെന്നും കൂട്ടിചേര്‍ത്തു.