ആധാറിനെ സോഷ്യൽ മീഡിയകളുമായി ബന്ധിപ്പിക്കുന്ന കാര്യം ആലോചനയില്‍ ഇല്ല: കേന്ദ്ര സര്‍ക്കാര്‍

News Desk

06 February 2020 05:09 PM

ന്യൂഡല്‍ഹി: ആധാറിനെ വ്യക്തികളുടെ സോഷ്യൽ മീഡിയ അക്കൗണ്ടുമായി ബന്ധിപ്പിക്കുമെന്ന വാര്‍ത്ത തള്ളി കേന്ദ്രസര്‍ക്കാര്‍. പല കേസുകളുമായും ബന്ധപ്പെട്ട് ഇത്തരം ആവശ്യങ്ങള്‍ നിരവധി തവണ ഉയര്‍ന്നു വന്നിട്ടുണ്ട്. എന്നാല്‍ ആധാറിനെ സാമൂഹ്യ മാദ്ധ്യമങ്ങളുമായി ബന്ധിപ്പിക്കുന്ന കാര്യം ആലോചനയില്‍ ഇല്ലെന്ന് കേന്ദ്ര നിയമമന്ത്രി രവി ശങ്കര്‍ പ്രസാദ് ലോക്‌സഭയില്‍ പറഞ്ഞു.

അതേസമയം, സാമൂഹിക മാദ്ധ്യമങ്ങളിലൂടെയുള്ള വ്യാജ വാര്‍ത്തകളും അശ്ലീല വീഡിയോകളും പ്രചരിപ്പിക്കുന്നത് തടയാന്‍ ആവശ്യമായ നടപടികള്‍ സ്വീകരിച്ചു വരികയാണെന്ന് അദ്ദേഹം പറഞ്ഞു. കുട്ടികളുടെ അശ്ലീല ദൃശ്യങ്ങള്‍ പ്രചരിക്കുന്നത് ഗുരുതരമായ പ്രശ്‌നമാണെന്നും അശ്ലീല ദൃശ്യങ്ങള്‍ ഉപയോഗിച്ച് പ്രതികാരം ചെയ്യുന്ന പ്രവണത വര്‍ദ്ധിച്ചു വരികയാണെന്നും രവി ശങ്കര്‍ പ്രസാദ് പറഞ്ഞു.