പോയത് വസ്തു തര്ക്കം തീര്ക്കാന്; ആരോപണങ്ങള് നിഷേധിച്ച് പി.ടി തോമസ്
എറണാകുളം: കൊച്ചിയില് ഭൂമി കച്ചവടത്തിന്റെ ഭാഗമായി കൈമാറാന് ശ്രമിച്ച 50 ലക്ഷം രൂപ ആദായനികുതി വകുപ്പ് പിടികൂടിയതുമായി ബന്ധപ്പെട്ട് തനിക്കെതിരായി ഉയരുന്ന ആരോപണങ്ങള് നിഷേധിച്ച് പി.ടി തോമസ് എംഎല്എ. വസ്തു സംബന്ധമായ തര്ക്കം തീര്ക്കാനാണ് പണം പിടിച്ചെടുത്ത സ്ഥലത്ത് എത്തിയതെന്ന് പി. ടി തോമസ് മാധ്യമങ്ങളോട് പറഞ്ഞു.
"കുടുംബത്തിന്റെ മൂന്ന് സെന്റ് സ്ഥലം കുടികിടപ്പ് അവകാശമായി കിട്ടിയതാണ്. കമ്മ്യൂണിസ്റ്റുകാരന്റേതാണ് കുടുംബം. പലവാതില് മുട്ടിയിട്ടും ഇവര്ക്ക് നീതി ലഭിച്ചില്ല," വാര്ഡ് കൗണ്സിലറുടെ ശുപാര്ശയിലാണ് കുടുംബം തന്നെ സമീപിച്ചതെന്നും വസ്തു തര്ക്കം പരിഹരിക്കാന് വിഷയത്തില് ഇടപെടുകയായിരുന്നു താനെന്നും പറഞ്ഞ പി.ടി തോമസ്, അപകീര്ത്തീപരമായ വാര്ത്ത നല്കിയ മാധ്യമങ്ങള്ക്കെതിരെ നിയമനടപടി സ്വീകരിക്കുമെന്നും വിശദീകരിച്ചു.
ഒക്ടോബര് രണ്ടിന് സിപിഎം ബ്രാഞ്ച് സെക്രട്ടറിയും, വാര്ഡ് കൗണ്സിലറും ഉള്പ്പടെയുള്ളവര് ഇക്കാര്യത്തില് ചര്ച്ച നടത്തിയിരുന്നു. ഇത് പ്രകാരമാണ് കരാര് എഴുതാന് തീരുമാനിച്ചത്. രാമകൃഷ്ണനും,രാജീവനും തമ്മില് വര്ഷങ്ങളായുള്ള ഭൂമിതര്ക്കമാണ് അത്.
വീട് വാങ്ങിയ രാമകൃഷ്ണന് പല തവണ വീട് തകര്ക്കാന് ശ്രമിച്ചെന്ന് രാജീവന്റെ കുടുംബം പരാതി പറഞ്ഞു. 50 ലക്ഷം രൂപയാണ് രാമകൃഷ്ണന് കൈമാറാനായി കൊണ്ടുവന്നത്. ഇത് കള്ളപ്പണമെങ്കില് രാമകൃഷ്ണനെതിരെ നടപടിയെടുക്കണം. താനും വാര്ഡ് കൗണ്സിലറും വിഷയത്തില് ഇടപെട്ടത് രാജീവന്റെ കുടുംബത്തെ സഹായിക്കാനാണെന്നും പി ടി തോമസ് പറഞ്ഞു.
കഴിഞ്ഞ ദിവസമാണ് ഇടപ്പളളി അഞ്ചുമന ക്ഷേത്രത്തിനടുത്തുളള രാജീവന് എന്നയാളുടെ വീട്ടില് നിന്ന് ആദായ നികുതി വകുപ്പ് പണം 50 ലക്ഷം രൂപ കണ്ടെടുത്തത്. റിയല് എസ്റ്റേറ്റ് ഏജന്റിന്റെ കൈയില് നിന്നാണ് പണം പിടിച്ചെടുത്തത്. ഈ സമയത്ത് പി.ടി തോമസ് എംഎല്എയും സ്ഥലത്തുണ്ടായിരുന്നു എന്ന് ആക്ഷേപം ഉയര്ന്നിരുന്നു. ഉദ്യോഗസ്ഥരെത്തിയതിന് മുന്പേ എംഎല്എ ഇവിടെ നിന്ന് പോവുകയും ചെയ്തു. ഭൂമിതര്ക്കം പരിഹരിക്കാന് എംഎല്എ എത്തിയെന്നാണ് സ്ഥലം ഉടമയുടെ വിശദീകരണം.