റിലയന്സ് ജിയോയുടെ 9.99 ശതമാനം ഓഹരി വാങ്ങി ഫേസ്ബുക്ക്; 43,574 കോടിയുടെ ഇടപാട്
ന്യൂഡല്ഹി: ടെലികോം മേഖലയിലെ വമ്പന്മാരായ റിലയന്സ് ജിയോയുടെ 9.99 ശതമാനം ഓഹരികള് സ്വന്തമാക്കി ഫേസ്ബുക്ക്. 5.7 ബില്യണ് യു.എസ് ഡോളറിന്റെ (43,574 കോടി രൂപ) ഇടപടാണ് നടന്നത് എന്നാണ് സൂചന. സമൂഹമാധ്യമങ്ങളിലെ അതികായരായ ഫേസ്ബുക്കുമായുള്ള ഇടപാടിലൂടെ ജിയോയുടെ മൂല്യം 4.62 ലക്ഷം കോടിയായി. രാജ്യത്തെ സാങ്കേതിക വിദ്യ മേഖലയിലെ ഏറ്റവും വലിയ നേരിട്ടുള്ള നിക്ഷേപമാണിത് എന്ന് റിലയന്സ് വ്യക്തമാക്കി.
ചൈനക്ക് ശേഷം ഏറ്റവും വലിയ രണ്ടാമത്തെ ഇന്റര്നെറ്റ് വിപണിയായ ഇന്ത്യയില് ശക്തമയ ഇടപെടല് നടത്താന് പുതിയ ഇടപാടിലൂടെ ഫേസ്ബുക്കിനാവും. അതിനാല് തന്നെ ഫേസ്ബുക്കിനും ജിയോക്കും ഈ ഇടപാട് ഏറെ ഗുണകരമാണ്. നിലവില് 400 മില്യണ് ഡോളറില്പരം വാട്സ്ആപ്പ് ഉപഭോക്താക്കള് ഫേസ്ബുക്കിന് സ്വന്തമാണ്. വാട്സ്ആപ് ഓണ്ലൈന് പേയ്മന്റ സംവിധാനം തുടങ്ങാനൊരുങ്ങുന്നുവെന്ന വാര്ത്തക്കിടയിലാണ് ജിയോയുമായുള്ള വന് സാമ്പത്തിക ഇടപാട് നടന്നിരിക്കുന്നത്.
ജിയോ രാജ്യത്ത് ഉണ്ടാക്കിയ നാടകീയമായ പരിവര്ത്തനം തങ്ങളില് സൃഷ്ടിച്ച ആവേശവും തങ്ങള്ക്ക് ഇന്ത്യയോടുള്ള പ്രതിബദ്ധതയുമാണ് ജിയോയില് തങ്ങള് നടത്തിയ നിക്ഷേപം അടിവരയിടുന്നതെന്ന് ഫേസ്ബുക്ക് വ്യക്തമാക്കി. തുടങ്ങിയിട്ട് നാല് വര്ഷത്തിനുള്ളില്തന്നെ 388 മില്യണ് ആളുകളെ പരസ്പരം ബന്ധിപ്പിക്കാന് ജിയോക്ക് സാധിച്ചുവെന്നും റിലയന്സ് ജിയോയുമായി ചേര്ന്ന് കൂടുതല് ജനങ്ങളെ പരസ്പരം ബന്ധിപ്പിക്കാന് തങ്ങള് പ്രതിജ്ഞാബദ്ധരാണെന്നും ഫേസ്ബുക്ക് കൂട്ടിച്ചേര്ത്തു.