മഹാരാഷ്ട്രയില്‍ നാല് മന്ത്രിമാര്‍ക്ക് കോവിഡ്

Ajith.A

19 February 2021 01:17 PM

മുംബൈ: ഇടവേളയ്ക്കു ശേഷം കോവിഡ് രോഗികളുടെ എണ്ണം വീണ്ടും പെരുകുന്ന മഹാരാഷ്ട്രയില്‍ ആരോഗ്യമന്ത്രി രാജേഷ് തോപ്പെ അടക്കം നാലു മന്ത്രിമാര്‍ക്ക് കോവിഡ്. ജലവിഭവ മന്ത്രിയും എന്‍ സി പി സംസ്ഥാന അധ്യക്ഷനുമായ ജയന്ത് പാട്ടീല്‍, അദ്ദേഹത്തിന്റെ വകുപ്പിലെ സഹമന്ത്രി ബാച്ചു കാഡു, ഭക്ഷ്യമന്ത്രി രാജേന്ദ്ര ശിങ്ങ്നെ എന്നിവരാണ് കഴിഞ്ഞ ദിവസം കോവിഡ് സ്ഥിരീകരിച്ച മറ്റ് മന്ത്രിമാര്‍. ഇവര്‍ക്കു പുറമേ ഈയിടെ ബിജെപി വിട്ട് എന്‍സിപിയില്‍ ചേര്‍ന്ന ഏകനാഥ് ഖഡ്സെക്കും രോഗം സ്ഥിരീകരിച്ചു. രണ്ടാം വട്ടമാണ് ഇദ്ദേഹത്തിന് കോവിഡ് ബാധിക്കുന്നത്.

കോവിഡ് രോഗികളുടെ എണ്ണം വീണ്ടും വര്‍ധിക്കുന്ന സാഹചര്യത്തില്‍ വിദര്‍ഭയിലെ യവത്മാലില്‍ രണ്ട് ദിവസത്തേക്ക് ഇളവുകള്‍ പിന്‍വലിച്ച്‌ ലോക് ഡൗണ്‍ നിയന്ത്രണങ്ങള്‍ കര്‍ക്കശമാക്കി. ആള്‍ക്കൂട്ടത്തെ നിയന്ത്രിക്കാന്‍ മുംബൈ നഗരസഭയും നിബന്ധനകള്‍ പുറപ്പെടുവിച്ചു. പാലിക്കാത്തവര്‍ക്ക് എതിരെ നിയമനടപടികളും ശക്തമാക്കി.

വ്യാഴാഴ്ച മുംബൈയില്‍ 736 പേര്‍ക്കാണ് കോവിഡ് സ്ഥിരീകരിച്ചത്. നാലു പേര്‍ മരിക്കുകയും ചെയ്തു. നിത്യവും കണ്ടെത്തുന്ന രോഗികളുടെ എണ്ണം ആയിരം കവിയുന്ന പക്ഷം പൂര്‍ണ്ണ ലോക്ഡൗണ്‍ അല്ലാതെ മറ്റ് മാര്‍ഗമില്ലെന്ന് സര്‍ക്കാര്‍ ജനങ്ങള്‍ക്ക് മുന്നറിയിപ്പ് നല്‍കി.