മലപ്പുറത്ത് കോവിഡ് ബാധിതരുടെ എണ്ണത്തില് നേരിയ കുറവ്; പുതിയ 792 കേസുകള്
മലപ്പുറം: മലപ്പുറം ജില്ലയില് ഞായറാഴ്ച 792 പേര്ക്ക് കോവിഡ് 19 സ്ഥിരീകരിച്ചതായി ജില്ലാ കളക്ടര് കെ. ഗോപാലകൃഷ്ണന് അറിയിച്ചു. ഇതില് 721 പേര്ക്കും നേരിട്ടുള്ള സമ്പർക്കത്തിലൂടെയാണ് രോഗബാധ.
രോഗം സ്ഥിരീകരിച്ചവരില് 60 പേര്ക്ക് ഉറവിടമറിയാതെയാണ് രോഗബാധയുണ്ടായത്. മൂന്ന് ആരോഗ്യ പ്രവര്ത്തകര്ക്കും രോഗം സ്ഥിരീകരിച്ചിട്ടുണ്ട്. രോഗബാധയുണ്ടായവരില് മൂന്ന് പേര് ഇതര സംസ്ഥാനങ്ങളില് നിന്നെത്തിയവരും ശേഷിക്കുന്ന അഞ്ച് പേര് വിവിധ വിദേശ രാജ്യങ്ങളില് നിന്നെത്തിയവരുമാണ്. 715 പേരാണ് ജില്ലയില് വിദഗ്ധ ചികിത്സയ്ക്ക് ശേഷം രോഗമുക്തരായത്. 19,162 പേര് ഇതുവരെ കോവിഡ് പ്രത്യേക ചികിത്സയ്ക്ക് ശേഷം രോഗം ഭേദമായി വീടുകളിലേക്ക് മടങ്ങി.
നിരീക്ഷണത്തില് 44,440 പേര്
44,440 പേരാണ് ഇപ്പോള് ജില്ലയില് നിരീക്ഷണത്തിലുള്ളത്. 6,746 പേരാണ് വിവിധ ചികിത്സാ കേന്ദ്രങ്ങളിലായി കഴിയുന്നത്. കോവിഡ് പ്രത്യേക ചികിത്സാ കേന്ദ്രങ്ങളായ ആശുപത്രികളില് 460 പേരും വിവിധ കോവിഡ് ഫസ്റ്റ് ലൈന് ട്രീറ്റ്മെന്റ് സെന്ററുകളില് 1,639 പേരുമാണ് നിരീക്ഷണത്തിലുള്ളത്. മറ്റുള്ളവര് വീടുകളിലും കോവിഡ് കെയര് സെന്ററുകളിലുമായി നിരീക്ഷണത്തിലാണ്.
ഇതുവരെ ജില്ലയില് നിന്ന് പരിശോധനക്കയച്ച 1,80,711 സാമ്പിളുകളില് 8,803 സാമ്പിളുകളുടെ ഫലങ്ങളാണ് ഇനി ലഭിക്കാനുള്ളത്. ഇതുവരെ 111 പേരാണ് കോവിഡ് ബാധിതരായി ജില്ലയില് മരണമടഞ്ഞത്.
ആരോഗ്യ ജാഗ്രത കര്ശനമായി പാലിക്കണം
പൊതു സമ്പര്ക്കത്തിലൂടെയുള്ള കോവിഡ് 19 വ്യാപനമാണ് ജില്ലയില് പൊതുജനാരോഗ്യത്തിന് ഭീഷണിയാകുന്നതെന്നിരിക്കെ രോഗ പ്രതിരോധ പ്രവര്ത്തനങ്ങളില് ഒരു കാരണവശാലും വീഴ്ച പാടില്ലെന്ന് ജില്ലാ മെഡിക്കല് ഓഫീസര് ഡോ. കെ. സക്കീന അറിയിച്ചു. ചെറിയ വീഴ്ചകള് പോലും വലിയ വിപത്തിന് കാരണമാകുമെന്ന സാഹചര്യമാണ് നിലവിലേത്. ഇത് ഉള്ക്കൊണ്ടുള്ള സമീപനമാണ് പൊതുജനങ്ങളില് നിന്ന് ഉണ്ടാകേണ്ടതെന്നും ജില്ലാ മെഡിക്കല് ഓഫീസര് പറഞ്ഞു.