സംസ്ഥാനത്ത് വാക്സിന്‍ സൗജന്യമായിരിക്കും: മുഖ്യമന്ത്രി

Ajith.A

21 April 2021 08:05 PM

സംസ്ഥാനത്ത് കോവിഡ് വാക്സിന്‍ സൗജന്യമായിരിക്കുമെന്ന മുന്‍ തീരുമാനത്തില്‍നിന്ന് മാറ്റമില്ലെന്ന് മുഖ്യമന്ത്രി പിണറായി വിജയന്‍. സംസ്ഥാനത്തെ കോവിഡ് സാഹചര്യങ്ങള്‍ സംബന്ധിച്ച വാര്‍ത്താ സമ്മേളനത്തില്‍ മാധ്യമപ്രവര്‍ത്തകരുടെ ചോദ്യങ്ങള്‍ക്ക് മറുപടി നല്‍കുകയായിരുന്നു അദ്ദേഹം.

എല്ലാവര്‍ക്കും വാക്സിന്‍ സൗജന്യമായിരിക്കുമെന്നും അത് പ്രായം അടിസ്ഥാനമാക്കിയാവില്ല നിശ്ചയിക്കുകയെന്നും മുഖ്യമന്ത്രി വ്യക്തമാക്കി. 18 മുതല്‍ 44 വയസ്സുവരെയുള്ളവര്‍ക്ക് കോവിഡ് വാക്സിന്‍ നല്‍കുന്നതുമായി ബന്ധപ്പെട്ട ചോദ്യത്തിനാണ് മുഖ്യമന്ത്രിയുടെ മറുപടി.

സംസ്ഥാനത്ത് കോവിഡ് രോഗവ്യപനം വര്‍ധിച്ച സാഹചര്യത്തില്‍ ആളുകള്‍ കൂട്ടംകൂടുന്ന പരിപാടികള്‍ ഒഴിവാക്കണമെന്ന് മുഖ്യമന്ത്രി പിണറായി വിജയന്‍. ആള്‍ക്കൂട്ടങ്ങള്‍, അടച്ചിട്ട ഇടങ്ങളിലെ കൂടിച്ചേരലുകള്‍, അടുത്ത ഇടപഴകലുകള്‍ എന്നിവ പരമാവധി ഒഴിവാക്കണമെന്നും അദ്ദേഹം വാര്‍ത്താ സമ്മേളനത്തില്‍ പറഞ്ഞു.

അടിയന്തര പ്രാധാന്യത്തോടെ കോവിഡ് പ്രതിരോധ നടപടികള്‍ സ്വീകരിക്കുമെന്നും അദ്ദേഹം പറഞ്ഞു. നിയന്ത്രണങ്ങള്‍ കര്‍ക്കശമാക്കുന്ന കാര്യം പരിഗണിക്കും. രോഗികളുടെ എണ്ണം ഉയരുന്നതനുസരിച്ച്‌ ചികിസ്താ സൗകര്യങ്ങള്‍ വര്‍ധിപ്പിക്കും.

35 ശതമാനത്തിലധികം കോവിഡ് വ്യാപനമുള്ള സ്ഥലത്ത് യുദ്ധകാലാടിസ്ഥാനത്തില്‍ ഇടപെടും. കോവിഡ് ആശുപത്രികളില്‍ നിരീക്ഷണം നടത്തുമെന്നും മുഖ്യമന്ത്രി പറഞ്ഞു. കോവിഡ് ബോധവല്‍ക്കരണം ശക്തമാക്കണം. ഇതിനായി എസ്‌എംഎസ് കാംപയിന്‍ തുടങ്ങുമെന്നും മുഖ്യമന്ത്രി പറഞ്ഞു.

സര്‍ക്കാര്‍ ജീവനക്കാരില്‍ 50 ശതമാനം പേര്‍ക്ക് റൊട്ടേഷന്‍ അടിസ്ഥാനത്തില്‍ വര്‍ക്ക് ഫ്രം ഹോം നടപ്പിലാക്കും. സ്വകാര്യ മേഖലയിലും വര്‍ക്ക് ഫ്രം ഹോം നടപ്പാക്കുന്ന കാര്യം പരിഗണിക്കും. വരുന്ന ശനിയാഴ്ച സംസ്ഥാനത്ത് അവധി പ്രഖ്യാപിച്ചിച്ചുണ്ട്. എന്നാല്‍ ഹയര്‍ സെകന്‍ഡറി പരീക്ഷയ്ക്ക് മാറ്റമുണ്ടാവില്ലെന്നും മുഖ്യമന്ത്രി അറിയിച്ചു.

ചില വാക്സിനേഷന്‍ കേന്ദ്രങ്ങളില്‍ ആള്‍ത്തിരക്കുണ്ടാവുന്ന സാഹചര്യമുണ്ട്. മേയ് ഒന്നിനു ശേഷം 18 വയസ്സിനുമുകളിലുള്ളവര്‍ക്ക് വാക്സിന്‍ ലഭ്യമാവുന്നതിനാല്‍ തിക്കും തിരക്കുമുണ്ടാവും. ഇത് കുറയ്ക്കാന്‍ നടപടിയെടുക്കും. ഓണ്‍ലൈനില്‍ രജിസ്ട്രര്‍ ചെയ്ത് അറിയിപ്പ് ലഭിച്ചവര്‍ക്ക് മാത്രം വാക്സിനേഷന്‍ നല്‍കുന്ന സംവിധാനം ഒരുക്കുമെന്നും എന്നും അദ്ദേഹം വ്യക്തമാക്കി.