ഇന്ത്യയിലെ മികച്ച തൊഴിലിടമെന്ന ബഹുമതി യു എസ് ടി ഗ്ലോബലിന്

Ajith.A

11 October 2019 10:20 AM

തിരുവനന്തപുരം: ഡിജിറ്റല്‍ ട്രാന്‍സ്ഫര്‍മേഷന്‍ സൊല്യൂഷന്‍സ് രംഗത്തെ ലോകത്തെ മുന്‍നിര കമ്പനിയായ യു എസ് ടി ഗ്ലോബല്‍ ഇന്ത്യയില്‍ പ്രവര്‍ത്തിക്കുന്ന കമ്പനികൾക്കിടയിൽ 2019-2020 ലെ ഏറ്റവും മികച്ച തൊഴിലിടം എന്ന ബഹുമതിക്ക് അര്‍ഹമായി. തൊഴിലിട സംസ്കാരങ്ങള്‍ വിലയിരുത്തുന്ന ആഗോള സംഘടനയായ ഗ്രേറ്റ് പ്ലേസ് ടു വര്‍ക്ക് (ജി പി ടി ഡബ്ലിയു ) ആണ് യു എസ് ടി ഗ്ലോബലിലെ ജീവനക്കാര്‍ക്ക് ലഭിക്കുന്ന മികച്ച തൊഴില്‍ സാഹചര്യം പരിഗണിച്ച്‌ ഈ ബഹുമതിക്കായി തിരഞ്ഞെടുത്തത്. ഇതോടെ, ഇന്ത്യയിലെയും അമേരിക്കയിലെയും ഗ്രേറ്റ് പ്ലേസ് ടു വര്‍ക്ക് ബഹുമതി യു എസ് ടി ഗ്ലോബല്‍ നേടിയിരിക്കുകയാണ്.

ഗ്രേറ്റ് പ്ലസ് ടു വര്‍ക്ക് യു എസ് ടി ഗ്ലോബലിലെ ജീവനക്കാര്‍ക്കിടയില്‍ നടത്തിയ വിലയിരുത്തലും, ട്രസ്റ്റ് ഇന്‍ഡക്സ് സര്‍വേയും പ്രകാരമാണ് ബഹുമതിക്ക് അര്‍ഹമായിട്ടുള്ളത്. യു എസ് ടി ഗ്ലോബലിന്റെ ഇന്ത്യയിലെ വികസനം, ജീവനക്കാരുടെ തൊഴില്‍പരമായ വികസനം, വ്യക്തിഗത മികവും സുരക്ഷിതത്വവും, ആനുകൂല്യങ്ങള്‍ തുടങ്ങി നിരവധി സവിശേഷതകള്‍ക്കുള്ള അംഗീകാരമാണ് പുതിയ സെര്‍ട്ടിഫിക്കേഷന്‍. 1999 മുതല്‍ക്ക് സവിശേഷമായ വളര്‍ച്ച കാഴ്ചവച്ചിട്ടുള്ള യു എസ് ടി ഗ്ലോബലില്‍ ഇന്ന് ആഗോളതലത്തില്‍ 23000 ജീവനക്കാരാണ് ജോലി ചെയ്യുന്നത്. ഇന്ത്യയില്‍ തിരുവനന്തപുരം, കൊച്ചി, ബെംഗളൂരു, ചെന്നൈ, ഹൈദരാബാദ്, ഗുഡ്ഗാവ്, ഭോപ്പാല്‍, പൂന എന്നിവിടങ്ങളിലായി ആകെ 15000ത്തിലധികം ജീവനക്കാരുണ്ട്.

ഇതോടൊപ്പം തന്നെ ജീവിത പരിവര്‍ത്തനമെന്ന ആശയത്തിലൂന്നി പ്രവര്‍ത്തിക്കുന്ന യു എസ് ടി ഗ്ലോബലിന്റെ വനിതാ സൗഹൃദ നയങ്ങള്‍ പ്രകീര്‍ത്തിക്കപ്പെട്ടിരിക്കുകയാണ്. കഴിഞ്ഞ നിരവധി വര്‍ഷങ്ങളായി മിഡില്‍ ലെവല്‍, സീനിയര്‍ ലെവല്‍ തസ്തികകളില്‍ കൂടുതല്‍ വനിതകളെ ഉള്‍പ്പെടുത്താനും, മികവ് കാട്ടുന്ന ജീവനക്കാരെ കമ്പനിയിൽ വളര്‍ച്ച നേടാന്‍ പ്രോത്സാഹിപ്പിക്കുകയും ചെയ്യുന്ന നയങ്ങള്‍ കമ്പനി നടപ്പിലാക്കി വരുന്നുണ്ട്. ഇത്തരം നയങ്ങളുടെ ഭാഗമായി, ഈ മാസം യു എസ് ടി ഗ്ലോബല്‍ ഇന്ത്യയിലെ 100 മികച്ച വനിതാ സൗഹൃദ കമ്പനികളുടെ പട്ടികയില്‍ സ്ഥാനം നേടി. കൂടാതെ, വര്‍ക്കിങ് മദര്‍ & അവതാര്‍100 ന്റെ മോസ്റ്റ് ഇന്‍ക്ലൂസിവ് കമ്പനിസ് ഇന്‍ഡക്സിലും സ്ഥാനം നേടിക്കഴിഞ്ഞു യു എസ് ടി ഗ്ലോബല്‍. നാനാത്വത്തിലും, ഉള്‍ക്കൊള്ളിക്കലിലും ഊന്നല്‍ നല്‍കികൊണ്ടുള്ള യു എസ് ടി ഗ്ലോബലിന്റെ പ്രവര്‍ത്തനങ്ങള്‍ക്കുള്ള അംഗീകാരമാണ് ഈ ബഹുമതികള്‍.