മോഷണം പോയ കെ.എസ്.ആര്.ടി.സി ബസ് ഉപേക്ഷിച്ച നിലയില് കണ്ടെത്തി
കൊല്ലം: കൊട്ടാരക്കര ഡിപ്പോയില് നിന്നും മോഷണം പോയ കെഎസ്ആര്ടിസി ബസ് കണ്ടെത്തി. കെ.എല് 157508 വേണാട് ബസാണ് ഇന്ന് പുലര്ച്ചെ മോഷണം പോയത്. മണിക്കൂറുകള് നീണ്ട അന്വേഷണത്തിനൊടുവില് പോലീസ് കൊല്ലം പാരിപ്പള്ളിയില് നിന്നും ബസ് കണ്ടെത്തി.
ഇന്ന് രാവിലെയാണ് ബസ് മോഷണം പോയ വിവരം അറിയുന്നത്. ഞയറാഴ്ച സര്വ്വീസ് പൂര്ത്തിയാക്കി രാത്രി പത്തരയോടെയാണ് ബസ് കൊട്ടാരക്കര ഡിപ്പോയില് എത്തിച്ചത്. ഗ്യാരേജിലെ പരിശോധനയ്ക്ക് ശേഷം മുനിസിപ്പല് ഓഫീസിന് സമീപം നിര്ത്തിയിട്ടു. തിങ്കളാഴ്ച രാവിലെ ബസ് സര്വ്വീസ് നടത്താനായി എത്തിയപ്പോള് ബസ് കാണുന്നില്ലായിരുന്നു. മറ്റേതെങ്കിലും ഡ്രൈവര് ബസ് മാറിയെടുത്തുകൊണ്ട് പോയെന്നാണ് ആദ്യം കരുതിയത്.
തുടര്ന്നുള്ള അന്വേഷണത്തിലാണ് മോഷണം പോയതാണെന്ന് തിരിച്ചറിഞ്ഞത്. സമീപത്തെ കടകളിലെ സിസിടിവി ദൃശ്യങ്ങള് പരിശോധിച്ചു. രാത്രി ഒന്നരയോടെ ബസുമായി കൊല്ലം ഭാഗത്തേയ്ക്ക് പോകുന്നത് ദൃശ്യങ്ങളില് വ്യക്തമായി. ഇതോടെയാണ് ബസ് മോഷണം പോയത് സ്ഥിരീകരിച്ചത്. പാരിപ്പള്ളിയിലെ മൈതാനത്ത് ബസ് ഉപേക്ഷിക്കപ്പെട്ട നിലയിലാണ് കണ്ടെത്തിയത്. എന്നാല് വണ്ടി മോഷ്ടിച്ച ആളെ കണ്ടെത്തിയിട്ടില്ല. മോഷ്ടിച്ചവര്ക്കായുള്ള അന്വേഷണം പുരോഗമിക്കുകയാണ്.