പാനൂരിലെ കൊലയ്ക്ക് പിന്നില്‍ രാഷ്ട്രീയ വിരോധമെന്ന് റിമാന്‍ഡ് റിപ്പോര്‍ട്ട്
തലശേരി: പാനൂരിലെ കൊലയ്ക്ക് പിന്നില്‍ രാഷ്ട്രീയ വിരോധമെന്ന് റിമാന്‍ഡ് റിപ്പോര്‍ട്ട്. ആക്രമണം കൊല്ലണമെന്ന ഉദ്ദേശത്തോടെയായിരുന്നു. 11 പേര്‍ കൊലപാതകത്തില്‍ നേരിട്ട് പങ്കെടുത്തു. കണ്ടാലറിയാവുന്ന മറ്റ് 14 പേര്‍ക്കും കൊലപാതകത്തില്‍ ബന്ധമുണ്ട്. മന്‍സൂറിനെ ബോംബെറിഞ്ഞ് വീഴ്ത്തിയശേഷം വടിവാളുകൊണ്ട് വെട്ടുകയായിരുന്നു. രക്തം വാര്‍ന്നാണ് മന്‍സൂര്‍ മരിച്ചതെന്നും റിമാന്‍ഡ് റിപ്പോര്‍ട്ടില്‍ പറയുന്നു.
അതേസമയം കൊലക്കേസ് പ്രതി ഷിനോസിനെ റിമാന്‍ഡ് ചെയ്തു. 14 ദിവസത്തേയ്ക്കാണ് റിമാന്‍ഡ് ചെയ്തത്. നടപടി തലശേരി ഫസ്റ്റ്ക്ലാസ് മജിസ്ട്രേറ്റ് കോടതിയുടേതാണ്.
പാനൂരിനടുത്ത് കടവത്തൂര്‍ പുല്ലൂക്കര മുക്കില്‍പീടികയില്‍ പോളിംഗ് ദിനത്തിലുണ്ടായ അക്രമത്തില്‍ യൂത്ത് ലീഗ് പ്രവര്‍ത്തകന്‍ പാറാല്‍ വീട്ടില്‍ മന്‍സൂര്‍ (22) ആണ് മരിച്ചത്. ഇരുപത്തിയഞ്ചോളം വരുന്ന സംഘം ആയുധങ്ങളുമായി എത്തി ഭീതി പരത്തിയശേഷം ബോംബെറിഞ്ഞ് മന്‍സൂറിനെയും സഹോദരനെയും പരിക്കേല്‍പ്പിക്കുകയായിരുന്നു.