കേരളത്തിലേക്ക് പുതിയ ഗവര്‍ണര്‍ ഉടന്‍
തിരുവനന്തപുരം: ഗവര്‍ണര്‍ പി സദാശിവത്തിന്റെ ഔദ്യോഗിക കാലാവധി അവസാനിക്കാനിരിക്കെ കേരളത്തിലേക്ക് പുതിയ ഗവര്‍ണറെത്തുന്നു. അടുത്ത ബുധനാഴ്ചയാണ് പി സദാശിവത്തിന്റെ കാലാവധി അവസാനിക്കുന്നത്. സുപ്രീംകോടതി ചീഫ് ജസ്റ്റിസായി വിരമിച്ചതിനു പിന്നാലെ, 2014 ആഗസ്റ്റ് 31നാണ് പി സദാശിവത്തെ കേരള ഗവര്‍ണറായി നിയമിച്ച്‌ കേന്ദ്രം ഉത്തരവിറക്കിയത്. എന്നാല്‍ സെപ്തംബര്‍ അഞ്ചിനാണ് അദ്ദേഹം ചുമതലയേറ്റത്.
വിരമിക്കുന്ന പശ്ചാത്തലത്തില്‍ വെള്ളിയാഴ്ച വരെയുള്ള പൊതുപരിപാടികളില്‍ മാത്രമേ ഗവര്‍ണര്‍ പങ്കെടുക്കുകയുള്ളൂ. തൃശൂര്‍ മെഡിക്കല്‍ കോളജില്‍ ആരോഗ്യ സര്‍വകലാശാലയുടെ ബിരുദ ദാനവും കൊച്ചിയില്‍ ന്യൂറോ സര്‍ജന്മാരുടെ സമ്മേളനവുമാണ് അദ്ദേഹത്തിന്റെ അവസാന പരിപാടികള്‍. പുതിയ ഗവര്‍ണറെ നിയമിച്ച്‌ ഉത്തരവുണ്ടാകും വരെ അദ്ദേഹത്തിന് രാജ് ഭവനില്‍ തന്നെ തുടരേണ്ടിവരും.
നേരത്തേ, ആന്ധ്രപ്രദേശ്, തെലങ്കാന സംസ്ഥാനങ്ങളുടെ ചുമതലയുള്ള ഗവര്‍ണറാകാന്‍ പി സദാശിവം കേന്ദ്രത്തെ താത്പര്യമറിയിച്ചിരുന്നു. എഴുപതുകാരനായ പി സദാശിവത്തെ മറ്റേതെങ്കിലും സംസ്ഥാനത്ത് ഒരു വട്ടം കൂടി ഗവര്‍ണറാക്കാനാണ് സാധ്യത. കേരളത്തിനൊപ്പം മറ്റ് 14 സംസ്ഥാനങ്ങളിലും ഗവര്‍ണറുടെ ഒഴിവുണ്ടാകുമെന്നതിനാല്‍ പദവിക്കായി മുതിര്‍ന്ന നേതാക്കളും വിരമിച്ച ഐ എ എസ്, ഐ പി എസ് ഉന്നതരെല്ലാം രംഗത്തുണ്ട്.