'മാന്‍ വേഴ്‌സസ് വൈല്‍ഡി'ല്‍ നരേന്ദ്ര മോദി, പുല്‍വാമ ആക്രമണ ദിവസം ചിരിച്ച്‌ കൊണ്ട് ഷൂട്ടെന്ന് കോണ്‍ഗ്രസ്!

Ajith.A

29 July 2019 04:40 PM

ദില്ലി: ഡിസ്‌കവറി ചാനലിലെ പ്രശസ്ത ഷോയായ മാന്‍ വേഴ്‌സസ് വൈല്‍ഡില്‍ അതിഥിയായി പ്രധാനമന്ത്രി നരേന്ദ്ര മോദി. ആഗസ്റ്റ് 21ന് ചാനലില്‍ സംപ്രേഷണം ചെയ്യുന്ന ഷോയിലാണ് നരേന്ദ്ര മോദി പങ്കെടുക്കുന്നത്. ഉത്തരാഖണ്ഡിലെ ജിം കോര്‍ബറ്റ് നാഷണല്‍ പാര്‍ക്കിലാണ് ഷോയുടെ അവതാരകനായ ബിയര്‍ ഗ്രില്‍സിനൊപ്പം പ്രധാനമന്ത്രി യാത്ര ചെയ്യുന്നത്. ഷോയുടെ ട്രെയിലര്‍ ഗ്രില്‍സ് ട്വിറ്ററില്‍ പങ്കുവെച്ചിട്ടുണ്ട്. പാരിസ്ഥിതിക മാറ്റത്തെ കുറിച്ചും മൃഗ സംരക്ഷണത്തെ കുറിച്ചും അവബോധമുണ്ടാക്കുന്നതിന് വേണ്ടിയാണ് ഇന്ത്യന്‍ പ്രധാനമന്ത്രി പരിപാടിയുടെ ഭാഗമായിരിക്കുന്നതെന്ന് ഗ്രില്‍സ് പറയുന്നു.

പരിപാടിയില്‍ പങ്കെടുത്തതിനെ കുറിച്ച്‌ മോദിയുടെ വാക്കുകള്‍ ഇങ്ങനെ: '' വര്‍ഷങ്ങളോളം കാട്ടിലും പര്‍വ്വതങ്ങളിലും ജീവിച്ച വ്യക്തിയാണ് ഞാന്‍. എന്റെ ജീവിതത്തില്‍ ആ അനുഭവത്തിന് വലിയ സ്വാധീനം ചെലുത്താന്‍ സാധിച്ചിട്ടുണ്ട്. രാഷ്ട്രീയത്തിനപ്പുറം പ്രകൃതിക്ക് നടുവില്‍ ഒരു ഷോ ചെയ്യുന്നതിനെ കുറിച്ച്‌ ചോദിച്ചപ്പോള്‍ എനിക്ക് വളരെ ജിജ്ഞാസയും താല്‍പര്യവും തോന്നി. ''

പ്രകൃതി സംരക്ഷണത്തെ കുറിച്ച്‌ ബോധവല്‍ക്കരിക്കുന്നതിനൊപ്പം നമ്മുടെ രാജ്യത്തിന്റെ പ്രകൃതി സമ്ബത്ത് ലോകത്തെ കാണിക്കാനുളള അവസരം കൂടിയാണ് ഈ ഷോയെന്നും മോദി അഭിപ്രായപ്പെട്ടു. പ്രകൃതിയെ അറിയാന്‍ അതീവ തല്‍പരനായ ഗ്രില്‍സിനൊപ്പം ഒരു തവണ കൂടി കാട്ടില്‍ സമയം ചിലവഴിക്കാനായത് മഹത്തായ അനുഭവമാണ് എന്നും നരേന്ദ്ര മോദി പ്രതികരിച്ചു. പുല്‍വാമ ഭീകരാക്രമണത്തിന്റെ സമയത്താണ് ഗ്രില്‍സ് ഇന്ത്യ സന്ദര്‍ച്ചതെന്ന് ഇന്ത്യന്‍ എക്‌സ്പ്രസ് റിപ്പോര്‍ട്ട് ചെയ്യുന്നു.

പുല്‍വാമ ആക്രമണം നടന്ന ജനുവരി 14ന് ഗ്രില്‍സ് ജിം കോര്‍ബറ്റ് നാഷണല്‍ പാര്‍ക്കിലുണ്ടായിരുന്നതായി ഇന്ത്യന്‍ എക്‌സ്പ്രസ് വാര്‍ത്തയില്‍ പറയുന്നു. 40 ജവാന്മാര്‍ക്ക് പുല്‍വാമയില്‍ ജീവന്‍ നഷ്ടപ്പെട്ട അന്ന് പ്രധാനമന്ത്രി നരേന്ദ്ര മോദി പാര്‍ക്കില്‍ ഡോക്യുമെന്ററി ചിത്രീകരിക്കുകയായിരുന്നുവെന്ന് പ്രതിപക്ഷം ആരോപണം ഉന്നയിച്ചിരുന്നു. പുല്‍വാമയെക്കുറിച്ച്‌ അറിഞ്ഞ ശേഷവും മോദി ഷൂട്ടിംഗ് തുടര്‍ന്നുവെന്നും പ്രതികരണം നടത്താന്‍ വൈകിയെന്നും ആരോപണം ഉയര്‍ന്നിരുന്നു. രാഹുല്‍ ഗാന്ധി ചിത്രങ്ങള്‍ സഹിതം ഇക്കാര്യം ട്വീറ്റ് ചെയ്യുകയുമുണ്ടായി. എന്നാല്‍ മോദിക്കെതിരെ അത്തരം ആരോപണം ഉയര്‍ത്തുന്നത് അപമാനകരം എന്നാണ് അന്ന് ബിജെപി ഇതേക്കുറിച്ച്‌ പ്രതികരിച്ചത്.

കടുവ സംരക്ഷണവുമായി ബന്ധപ്പെട്ട ഔദ്യോഗിക പരിപാടിയില്‍ പങ്കെടുക്കുകയായിരുന്നു മോദി എന്നാണ് മന്ത്രി രവിശങ്കര്‍ പ്രസാദ് അന്ന് മാധ്യമങ്ങളോട് വിശദീകരിച്ചത്. മാന്‍ വേഴ്‌സസ് വൈല്‍ഡിന്റെ ട്രെയിലര്‍ പുറത്ത് വന്നതോടെ കോണ്‍ഗ്രസ് വീണ്ടും മോദിക്കെതിരെ രംഗത്ത് വന്നിട്ടുണ്ട്. പുല്‍വാമ ഭീകരാക്രമണത്തെ കുറിച്ച്‌ വിവരം ലഭിച്ച ശേഷവും മോദി ചിരിച്ച്‌ കൊണ്ട് ഷൂട്ട് ചെയ്യുകയാണെന്ന് കോണ്‍ഗ്രസ് വക്താവ് ഷമ മുഹമ്മദ് ട്വിറ്ററില്‍ കുറിച്ചു.