കൊവിഡ് വാക്സിന്‍: കേന്ദ്രം ആഗോള ടെന്‍ഡര്‍ വിളിക്കണമെന്ന് ആവശ്യപ്പെട്ട് പ്രധാനമന്ത്രിക്ക് മുഖ്യമന്ത്രിയുടെ കത്ത്

News Desk

24 May 2021 07:24 PM

കേന്ദ്ര സര്‍ക്കാര്‍ നേരിട്ട് ആ​ഗോള ടെന്‍ഡര്‍ വിളിച്ചാല്‍ കൊവിഡ് വാക്സിന്‍ വില ഉയരുന്നത് നിയന്ത്രിക്കാന്‍ കഴിയുമെന്ന് മുഖ്യമന്ത്രി പിണറായി വിജയന്‍ പറഞ്ഞു. ഇക്കാര്യം ആവശ്യപ്പെട്ട് പ്രധാനമന്ത്രി നരേന്ദ്രമോദിക്ക് കത്തയച്ചു. സംസ്ഥാനത്തിന്റെ പക്കലുള്ള വാക്സിന്‍ സ്റ്റോക്ക് തീര്‍ന്നതുകൊണ്ടാണ് വാക്സിന്‍ വാങ്ങാന്‍ ആ​ഗോള ടെണ്ടര്‍ സംസ്ഥാന സര്‍ക്കാര്‍ വിളിച്ചതെന്നും മുഖ്യമന്ത്രി പറഞ്ഞു.

രോഗവ്യാപനം നിയന്ത്രിക്കാന്‍ ഏറ്റവും ഫലപ്രദമായ മാര്‍ഗം സമൂഹത്തില്‍ പരമാവധി പേര്‍ക്ക് വാക്സിന്‍ നല്‍കലാണ്. അങ്ങനെയാണ് സാമൂഹ്യ പ്രതിരോധ ശേഷി ആര്‍ജ്ജിക്കാനാവുക. എന്നാല്‍ വാക്സിനുകളുടെ കുറവ് ആസൂത്രണം ചെയ്ത വേഗതയില്‍ വാക്സിനേഷന്‍ മുന്നോട്ട് കൊണ്ടുപോകാന്‍ സാധിക്കാത്ത സാഹചര്യം ഉണ്ടാക്കി. 45 വയസിന് മുകളിലുള്ളവര്‍ക്ക് വാക്സിനേഷന് വേണ്ട വാക്സിന്‍ നല്‍കേണ്ടത് കേന്ദ്രസര്‍ക്കാരാണ്.

സംസ്ഥാനത്തിന്റെ പക്കലുള്ള സ്റ്റോക്ക് തീര്‍ന്നിട്ട് ദിവസങ്ങളായി. കേന്ദ്രസര്‍ക്കാരിന്റെ ശ്രദ്ധയില്‍ ഇത് പെടുത്തി. ഇതിനെ തുടര്‍ന്നാണ് വാക്സിന്‍ വാങ്ങാന്‍ സംസ്ഥാന സര്‍ക്കാര്‍ ആഗോള ടെണ്ടര്‍ വിളിച്ചത്. ഓരോ സംസ്ഥാനവും ടെണ്ടര്‍ വിളിച്ചാല്‍ വില കുത്തനെ ഉയരാന്‍ സാധ്യതയുണ്ട്. ഓരോ സംസ്ഥാനത്തും എത്ര വാക്സിനാണ് വേണ്ടതെന്ന് കണക്കാക്കി രാജ്യത്തിനാകെ വേണ്ട വാക്സിന്‍ വാങ്ങുന്നതിനുള്ള ആഗോള ടെണ്ടര്‍ കേന്ദ്രസര്‍ക്കാര്‍ തന്നെ വിളിച്ചാല്‍ വാക്സിനുകളുടെ വില ഉയരാതെ നിലനിര്‍ത്താം. ഇതാവശ്യപ്പെട്ട് പ്രധാനമന്ത്രിക്ക് കത്തയച്ചു.

കേന്ദ്രം വാക്സിന്‍ നല്‍കിയാല്‍ മാത്രമേ 45ന് മുകളില്‍ ഉള്ളവര്‍ക്ക് വാക്‌സിന്‍ നല്കാനാവൂ. സംസ്ഥാനം വില കൊടുത്തു വാങ്ങിയ വാക്‌സിന്‍ മറ്റു വിഭാഗങ്ങള്‍ക്ക് നല്‍കാനാവില്ല. പ്രോട്ടോകോള്‍ മാറ്റം ഉണ്ടാവില്ല. വില കൊടുത്തു വാങ്ങിയത് 18നും 44നും ഇടയില്‍ ഉള്ളവര്‍ക്ക് മാത്രം നല്‍കുമെന്നും മുഖ്യമന്ത്രി അറിയിച്ചു.