ലൈഫ് മിഷന്‍: സ്വന്തമായി വീടില്ലാത്തവര്‍ക്ക് ഇപ്പോള്‍ അപേക്ഷിക്കാം
ലൈഫ് മിഷന്‍ പദ്ധതിയില്‍ വീടിനുവേണ്ടി ഓണ്‍ലൈനില്‍ അപേക്ഷ സമര്‍പ്പിക്കാന്‍ വീണ്ടും അവസരം. മുന്‍പ് അപേക്ഷിക്കാന്‍ വിട്ടുപോയ അര്‍ഹരായവര്‍ക്ക് ഫെബ്രുവരി 20 വരെ അപേക്ഷിക്കാം. മുന്‍പ് ലൈഫ് മിഷനില്‍ വീടിനുള്ള അപേക്ഷ സമര്‍പ്പിക്കാന്‍ 2020 സെപ്റ്റംബര്‍ 23 വരെ സര്‍ക്കാര്‍ സമയം നല്‍കിയിരുന്നു. എന്നാല്‍, അര്‍ഹരായ ഒട്ടേറെപ്പേര്‍ക്ക് അപേക്ഷിക്കാന്‍ കഴിഞ്ഞില്ല. ഈ പശ്ചാത്തലത്തിലാണ് തദ്ദേശ സ്വയംഭരണ വകുപ്പ് വീണ്ടും അവസരം നല്‍കിയിരിക്കുന്നത്.
ലൈഫ് ഗുണഭോക്തൃ പട്ടികയില്‍നിന്നു വിട്ടുപോയ അര്‍ഹരായ, ഭൂമിയുള്ള ഭവനരഹിതര്‍ക്കും ഭൂമിയില്ലാത്ത ഭവനരഹിതര്‍ക്കും അപേക്ഷ സമര്‍പ്പിക്കാം. ഒരേ റേഷന്‍കാര്‍ഡില്‍ ഉള്‍പ്പെടുന്നവരെ ഒറ്റ കുടുംബമായി പരിഗണിച്ച്‌ ഒരു ഭവനത്തിനു മാത്രമായാണു പരിഗണിക്കുക. പട്ടികജാതി/ പട്ടികവര്‍ഗ/ മത്സ്യത്തൊഴിലാളി വിഭാഗങ്ങള്‍ക്ക് ഈ വ്യവസ്ഥയില്‍ ഇളവുണ്ട്. അപേക്ഷകന്റെ കുടുംബ വാര്‍ഷിക വരുമാനം മൂന്നു ലക്ഷം രൂപയില്‍ കവിയാന്‍ പാടില്ല.
നിങ്ങളുടെ മൊബൈല്‍ നമ്ബര്‍ ഉപയോഗിച്ച്‌ ആദ്യം റജിസ്റ്റര്‍ ചെയ്യണം. തുടര്‍ന്ന് റജിസ്റ്റേഡ് മൊബൈല്‍ നമ്ബരും പാസ്‌വേഡും ഉപയോഗിച്ച്‌ ലോഗിന്‍ ചെയ്ത് അപേക്ഷ സമര്‍പ്പിക്കാം. സ്വന്തമായോ തദ്ദേശ സ്വയംഭരണസ്ഥാപനങ്ങളുടെ നേതൃത്വത്തിലുള്ള ഹെല്‍പ് ഡസ്കുകള്‍ വഴിയോ അപേക്ഷ സമര്‍പ്പിക്കാം. റേഷന്‍കാര്‍ഡ്, ആധാര്‍ കാര്‍ഡ്, ജാതിസര്‍ട്ടിഫിക്കറ്റ്, വരുമാന സര്‍ട്ടിഫിക്കറ്റ് തുടങ്ങിയ രേഖകള്‍ അപേക്ഷയോടൊപ്പം സമര്‍പ്പിക്കണം. www.life2000.kerala.gov.in എന്ന വെബ്സൈറ്റില്‍നിന്നു കൂടുതല്‍ വിവരങ്ങള്‍ ലഭിക്കും.
Related News
സംശയിക്കേണ്ട, ലൈഫ് കേന്ദ്രപദ്ധതിയല്ലെന്ന് മുഖ്യമന്ത്രി
ലൈഫ് മിഷന്റെ മറവില്‍ അധോലോക ഇടപാട് നടന്നെന്ന് സിബിഐ സുപ്രീം കോടതിയില്‍
ലൈഫ് വീടുകള്‍ക്ക് ഇന്‍ഷ്വറന്‍സ് പരിരക്ഷ