സംശയിക്കേണ്ട, ലൈഫ് കേന്ദ്രപദ്ധതിയല്ലെന്ന് മുഖ്യമന്ത്രി

News Desk

29 March 2021 10:17 PM

കണ്ണൂര്‍:കേന്ദ്രത്തില്‍ നിന്നുവരുന്ന ചിലര്‍ പ്രചരിപ്പിക്കുന്നത് പോലെ ലൈഫ് ഭവനപദ്ധതി കേന്ദ്ര സര്‍ക്കാരിന്റെ പദ്ധതിയല്ലെന്ന് മുഖ്യമന്ത്രി പിണറായി വിജയന്‍.ഫെഡറല്‍ സംവിധാനത്തില്‍ കേന്ദ്രം നല്‍കുന്നത് സംസ്ഥാനങ്ങള്‍ക്കുള്ള അവകാശമാണെന്നും ഔദാര്യമോ സഹായമോ അല്ലെന്നും അദ്ദേഹം പറഞ്ഞു.

ഇരിട്ടി, പാനൂര്‍, കണ്ണൂര്‍ സിറ്റി, പുതിയതെരു, തളിപ്പറമ്ബ് ടൗണ്‍ എന്നിവിടങ്ങളിലെ എല്‍.ഡി. എഫ് തിരഞ്ഞെടുപ്പ് റാലിയില്‍ പങ്കെടുത്ത് സംസാരിക്കുകയായിരുന്നു മുഖ്യമന്ത്രി.ലൈഫ് ഏകീകൃത ഭവനപദ്ധതിയാണ്.

തദ്ദേശ വകുപ്പ്, പട്ടികജാതിപട്ടികവര്‍ഗ വകുപ്പ്, ഫിഷറീസ് വകുപ്പ് എന്നിവയുടെ വിവിധ പാര്‍പ്പിട പദ്ധതികളും പ്രധാനമന്ത്രി ആവാസ് യോജന അര്‍ബന്‍, റൂറല്‍ പാര്‍പ്പിട പദ്ധതികളും ഒരു കുടക്കീഴിലാക്കിയാണ് ലൈഫ് മിഷന്‍ പാര്‍പ്പിട പദ്ധതിക്ക് രൂപം നല്‍കിയത്. ഇക്കാര്യം പ്രധാനമന്ത്രിയേയും അറിയിച്ചതാണ്.

കേരളത്തിന് അര്‍ഹതപ്പെട്ട അവകാശങ്ങള്‍ നല്‍കാന്‍ കേന്ദ്രത്തിന് ബാദ്ധ്യതയുണ്ട്.ഇതില്‍ സംസ്ഥാന സര്‍ക്കാരിന്റെയും വിവിധ വകുപ്പുകളുടെയും വിഹിതം മാത്രം ഉപയോഗിച്ച്‌ 1,70,427 വീടുകളാണ് നിര്‍മ്മിച്ചിട്ടുള്ളത്. ഈ ഓരോ വീടുകള്‍ക്കുമുള്ള സംസ്ഥാന സര്‍ക്കാറിന്റെ വിഹിതം നാലു ലക്ഷം രൂപയാണ്.

ലൈഫ് വഴി 2,52,748 വീടുകള്‍ പൂര്‍ത്തിയാക്കി. മാര്‍ച്ച്‌ പത്തുവരെയുള്ള കണക്കുപ്രകാരം മൂന്നു ഘട്ടങ്ങളിലായാണ് ഇവ പൂര്‍ത്തിയാക്കിയതെന്നും മുഖ്യമന്ത്രി പറഞ്ഞു.

എല്‍.ഡി.എഫ് സര്‍ക്കാര്‍ നടത്തിയ പ്രവര്‍ത്തനം നാട് തിരിച്ചറിഞ്ഞിട്ടുണ്ട്. അതിന്റെ പ്രതിഫലനം ജനങ്ങളില്‍നിന്ന് ഉണ്ടാകുന്നു . വലിയ പിന്തുണയാണ് സര്‍ക്കാരിന് ലഭിക്കുന്നതെന്നും മുഖ്യമന്ത്രി പറഞ്ഞു.