ദേഹാസ്വാസ്ഥ്യം; കമറുദ്ദീനെ ആശുപത്രിയിലെത്തിച്ച് പരിശോധിച്ച ശേഷം തിരികെ ജയിലിലേക്ക് അയച്ചു
കാസര്കോട്: ജ്വല്ലറി നിക്ഷേപത്തട്ടിപ്പ് കേസില് റിമാന്ഡില് കഴിയുന്ന എം സി കമറുദ്ദീന് എംഎല്എയെ ശാരീരിക ബുദ്ധിമുട്ടുകളെ തുടര്ന്ന് വൈദ്യ പരിശോധന നടത്തി. കാസര്കോട് ജനറല് ആശുപത്രിയില് എത്തിച്ചായിരുന്നു പരിശോധന. ഗുരുതരമായ ആരോഗ്യ പ്രശ്നങ്ങളൊന്നും ഇല്ലെന്ന് കണ്ടതിനാല് എംഎല്എയെ കാഞ്ഞങ്ങാട് ജയിലിലേക്ക് തന്നെ മാറ്റി. അതേസമയം എം സി കമറുദ്ദീനെ കസ്റ്റഡിയില് ആവശ്യപ്പെട്ട് അന്വേഷണ സംഘം നല്കിയ അപേക്ഷ പരിഗണിച്ച ഹൊസ്ദുര്ഗ് മജിസ്ട്രേറ്റ് കോടതി ഉച്ചക്ക് രണ്ട് മണിക്ക് വീഡിയോ കോണ്ഫറന്സിലൂടെ എംഎല്എയെ ഹാജരാക്കാന് ഉത്തരവിട്ടു.
ജ്വല്ലറി നിക്ഷേപ തട്ടിപ്പുമായി ബന്ധപ്പെട്ട 36 കേസുകളില് കൂടി എം സി കമറുദ്ദീനെ ഇന്നലെ റിമാന്ഡ് ചെയ്തിരുന്നു. ഹൊസ്ദുര്ഗ് ഒന്നാം ക്ലാസ് മജിസ്ട്രേറ്റ് കോടതിയാണ് റിമാന്ഡ് ചെയ്തത്. അതേസമയം പ്രത്യേക അന്വേഷണ സംഘം അന്വേഷിക്കുന്ന രണ്ട് കേസുകളില് കൂടി എംഎല്എയുടെ അറസ്റ്റ് രേഖപ്പെടുത്തി.