സംസ്ഥാനത്ത് കനത്ത മഴ; പലയിടത്തും വെള്ളക്കെട്ട്
കോട്ടയം | സംസ്ഥാനത്ത് വിവിധ ഭാഗങ്ങളില്‍ പെയ്ത കനത്ത മഴയില്‍ റോഡ്, റെയില്‍ ഗതാഗതം തടസ്സപ്പെട്ടു. താഴ്ന്ന പ്രദേശങ്ങളില്‍ വെള്ളക്കെട്ട് രൂപപ്പെട്ടു. തൃശൂര്‍ മുതല്‍ തിരുവനന്തപുരം വരെയുള്ള ജില്ലകളിലാണ് വ്യാപകമായ മഴ ലഭിച്ചത്. കോട്ടയം-ചിങ്ങവനം റെയില്‍ പാതയില്‍ റെയില്‍വേ തുരങ്കത്തിന് സമീപം മണ്ണിടിച്ചിലുണ്ടായതിനെ തുടര്‍ന്ന് കോട്ടയം വഴിയുള്ള ട്രെയിന്‍ ഗതാഗതം നിര്‍ത്തി വച്ചു. ഇന്ന് രാവിലെയോടെയാണ് തുരങ്കത്തിന്റെ കോട്ടയം- തിരുവനന്തപുരം ദിശയില്‍ മണ്ണിടിഞ്ഞത്. കൊവിഡ് സാഹചര്യത്തില്‍ ട്രെയിന്‍ സര്‍വീസുകള്‍ കുറവായതിനാലാണ് വന്‍ ദുരന്തം ഒഴിവായത്. മണ്ണിടിച്ചിലുണ്ടായതിനെ തുടര്‍ന്ന് തിരുവനന്തപുരം-എറണാകുളം വേണാട് സ്‌പെഷ്യല്‍ ട്രെയിന്‍ ചങ്ങനാശ്ശേരി വരെ മാത്രമേ ഓടുകയുള്ളൂ.
കോട്ടയം നഗരസഭയിലെ 49-ാം വാര്‍ഡിലെ ചുങ്കം പഴയ സെമിനാരി മീനച്ചില്‍ റിവര്‍ റോഡിന്റെ പകുതിയോളം ഭാഗം മഴയില്‍ ഇടിഞ്ഞു.ഈ ഭാഗത്ത് വന്‍മരം കടപുഴകി വീഴുകയും ചെയ്തതോടെ ഗതാഗതം തടസ്സപ്പെട്ടു. വൈക്കത്തിനടുത്ത് ചെമ്ബില്‍ കനത്ത മഴയെ തുടര്‍ന്ന് വീടുകളിലേക്ക് വെള്ളം കയറി. എറണാകുളം ജില്ലയിലും ശക്തമായ മഴയാണ് പെയ്യുന്നത്. കൊച്ചി നഗരത്തില്‍ എം ജി റോഡ്, ചിറ്റൂര്‍ റോഡ്, പി ആന്‍ഡ് ഡി കോളനി, കമ്മട്ടിപ്പാടം എന്നിവിടങ്ങളില്‍ വെള്ളക്കെട്ട് രൂപപ്പെട്ടിട്ടുണ്ട്. കെ സ് ആര്‍ ടി സി ബസ് സ്റ്റാന്‍ഡിലും വെള്ളം കയറി.
വ്യാഴാഴ്ച മുതല്‍ വടക്കന്‍ ജില്ലകളിലേക്കും മഴ വ്യാപിക്കുമെന്ന് കേന്ദ്ര കാലാവസ്ഥാ നിരീക്ഷണകേന്ദ്രം അറിയിച്ചു. കേരളം, തമിഴ്‌നാട്, കര്‍ണാടക സംസ്ഥാനങ്ങളില്‍ അടുത്ത 3-4 ദിവസങ്ങളില്‍ വ്യാപകമായി മഴ തുടരാനും സാധ്യതയുണ്ട്.
Related News
സംസ്ഥാനത്ത് കനത്ത മഴ തുടരും
അടുത്ത മൂന്ന് മണിക്കൂര് ശക്തമായ കാറ്റും മഴയും; 11 ജില്ലകളില് യെല്ലോ അലര്ട്ട്
സംസ്ഥാനത്ത് കനത്ത മഴ; ഓറഞ്ച്, യെല്ലോ അലര്ട്ടുകള് പ്രഖ്യാപിച്ചു
കേരളത്തില് അതിതീവ്ര മഴയ്ക്ക് സാധ്യത