കനത്ത മഴ; എട്ട് ജില്ലകളിൽ അവധി പ്രഖ്യാപിച്ചു; പരീക്ഷകളിൽ മാറ്റം

Ajith.A

08 August 2019 04:15 PM

കനത്ത മഴയെ തുടര്‍ന്ന് പത്തനംതിട്ട, തൃശൂര്‍, ആലപ്പുഴ, കോഴിക്കോട് , എറണാകുളം, ഇടുക്കി, കണ്ണൂര്‍, കോട്ടയം ജില്ലകളിലെ പ്രഫഷണല്‍ കോളജുകള്‍ ഉള്‍പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്‍ക്കും നാളെ അവധി പ്രഖ്യാപിച്ചു. ജില്ലാ കലക്ടര്‍മാരാണ് ഇക്കാര്യം അറിയിച്ചത്.  പത്തനംതിട്ട ജില്ലയിലെ എല്ലാ വിദ്യാഭ്യാസ സ്ഥാപനങ്ങൾക്കും ജില്ലാ കളക്ടർ നാളെ അവധി പ്രഖ്യാപിച്ച. അങ്കണവാടികളും പ്രൊഫഷണൽ കോളേജുകളും അടക്കം എല്ലാ വിദ്യാഭ്യാസ സ്ഥാപനങ്ങൾക്കും അവധി ബാധകം.മഴ തുടരുന്ന സാഹചര്യത്തിൽ എറണാകുളം ജില്ലയിലെ പ്രൊഫഷണൽ കോളേജുകൾ ഉൾപ്പെടെയുള്ള എല്ലാ വിദ്യാഭ്യാസ സ്ഥാപനങ്ങൾക്കും വെള്ളിയാഴ്ച അവധിയായിരിക്കുമെന്ന് ജില്ലാ കളക്ടർ അറിയിച്ചു. സിബിഎസ്ഇ, ഐസിഎസ്ഇ, ഐഎസ്ഇ സ്കൂളുകൾക്കും കേന്ദ്രീയ വിദ്യാലയങ്ങൾ അങ്കണവാടികൾ എന്നിവയ്ക്കും അവധി ബാധകമായിരിക്കും. എറണാകുളം ജില്ലയിൽ  പരീക്ഷകൾക്ക് മാറ്റമില്ല.

കാലിക്കറ്റ് സര്‍വകലാശാല നാളെ നടത്താനിരുന്ന എല്ലാ പരീക്ഷകളും മാറ്റിവെച്ചു. കനത്തമഴ തുടരുന്ന പശ്ചാത്തലത്തിലാണ് തീരുമാനം. ജയില്‍ വെല്‍ഫെയര്‍ ഓഫീസര്‍ തസ്തികയിലേക്ക് പിഎസ്‌സി നാളെ നടത്താനിരുന്ന പരീക്ഷയും മാറ്റിവെച്ചു. 30ലേക്കാണ് പരീക്ഷ മാറ്റിവെച്ചത്.