സര്ക്കാര് ജീവനക്കാരുടെ സാലറി കട്ട് പിന്വലിച്ചു; പിടിച്ച ശമ്പളം അടുത്ത മാസം മുതല് നല്കും
കോവിഡിന്റെ പശ്ചാത്തലത്തില് ഏര്പ്പെടുത്തിയ സാലറി കട്ട് സംസ്ഥാന സര്ക്കാര് പിന്വലിച്ചു. മന്ത്രിസഭ യോഗത്തിലാണ് സര്ക്കാര് ജീവനക്കാരുടെ ശമ്പളം ഇനി പിടിക്കേണ്ടതില്ലെന്നു തീരുമാനിച്ചത്. ഇതുവരെ പിടിച്ച ശമ്പളം അടുത്ത മാസം മുതല് നല്കും. പിടിച്ചെടുത്ത തുക പിഎഫില് ലയിപ്പിക്കാനാണ് നിര്ദേശം. സാലറി കട്ട് തുടരുന്നത് വിവിധ സംഘടനകള് എതിര്ത്ത സാഹചര്യത്തിലാണ് ധനവകുപ്പിന്്റെ ശുപാര്ശ മന്ത്രിസഭ യോഗം അംഗീകരിച്ചത്.
കൊവിഡ് പ്രതിസന്ധി രൂക്ഷമായതിനെ തുടര്ന്നാണ് സര്ക്കാര് നിര്ബന്ധിത സാലറി കട്ട് ഏര്പ്പെടുത്തിയത്. ശമ്പളത്തിന്റെ 20 ശതമാനം പിടിക്കാനായിരുന്നു നിര്ദേശം. മുന്പ് പ്രളയത്തെ തുടര്ന്ന് സാലറി ചാലഞ്ച് കൊണ്ട് വന്നെങ്കിലും അത് നിര്ബന്ധിത നടപടി ആയിരുന്നില്ല.
നേരത്തെ സാലറി കട്ട് ആറ് മാസത്തേക്കും കൂടി തുടരാന് സര്ക്കാര് തീരുമാനിച്ചിരുന്നു. ഇതില് പ്രതിഷേധം കടുത്തതോടെയാണ് നടപടി പിന്വലിച്ചത്.
സാമൂഹിക മാധ്യമങ്ങളിലൂടെ സ്ത്രീകള്ക്കെതിരെ നടത്തുന്ന ആക്രമണം തടയാന് പൊലീസ് ആക്ടില് ഭേദഗതി വരുത്താനും മന്ത്രിസഭ യോഗം തീരുമാനിച്ചു.പൊലീസ് ആക്ടിലെ 118 എ വകുപ്പിലാണ് ഭേദഗതി വരുത്തുന്നത്.