ഗുരുവായൂരില്‍ ഇന്ന് മുതല്‍ ഭക്തര്‍ക്ക് പ്രവേശനമില്ല

Ajith.A

12 December 2020 09:22 AM

തൃശൂര്‍: ഗുരുവായൂര്‍ ക്ഷേത്രത്തില്‍ ഭക്തര്‍ക്ക് ഇന്ന് മുതല്‍ പ്രവേശനമില്ല . 46 ക്ഷേത്ര ജീവനക്കാര്‍ക്ക് കൊറോണ സ്ഥിരീകരിച്ചതിനെ തുടര്‍ന്നാണ് നടപടി. പൂജകളും ചടങ്ങുകളും മാത്രം മുടക്കമില്ലാതെ നടക്കും. ഗുരുവായൂര്‍ ഇന്നര്‍ റോഡിനുള്ളിലുള്ള പ്രദേശങ്ങള്‍ കണ്ടൈന്‍മെന്‍റ് സോണായി പ്രഖ്യാപിച്ചു.

ഗുരുവായൂര്‍ ക്ഷേത്രത്തില്‍ കൂടുതല്‍ ജീവനക്കാര്‍ക്ക് രോഗം സ്ഥിരീകരിച്ചതോടെ ഇളവ് വരുത്തിയ നിയന്ത്രണങ്ങള്‍ കഴിഞ്ഞ ദിവസം പുനഃസ്ഥാപിച്ചിരുന്നു. ഇതേ തുടര്‍ന്ന് ജീവനക്കാരെ പരിശോധനയ്ക്ക് വിധേയമാക്കിയപ്പോഴാണ് രോഗബാധ വ്യാപിച്ചതായി കണ്ടെത്തിയത്. രോഗവ്യാപനം ഗുരുതരമായതായി കണ്ടെത്തിയതോടെ ജില്ലാ കളക്ടര്‍ ദേവസ്വം അധികൃതരുമായി അടിയന്തിര ചര്‍ച്ച നടത്തി.

ഭക്തരെ പ്രവേശിപ്പിക്കുന്നത് താത്കാലികമായി വിലക്കാന്‍ തീരുമാനിച്ചു. 2 ആഴ്ച്ചത്തേക്കാണ് വിലക്ക്. ഇന്ന് നടത്താന്‍ നിശ്ചയിച്ചിരുന്ന വിവാഹങ്ങള്‍ മാത്രം കര്‍ശന നിയന്ത്രണങ്ങളോടെ നടത്തും. ദീപസ്തംഭത്തിന് മുന്നില്‍ തൊഴാനുള്ള അവസരവും ഉണ്ടാവില്ല. നടപ്പന്തലുകള്‍ അടച്ചിടും. തുലാഭാരമടക്കമുള്ള മറ്റു വഴിപാടുകളും നിര്‍ത്തിവച്ചു. പൂജകളും ചടങ്ങുകളും മാത്രം മുടക്കമില്ലാതെ നടത്തും.

മുഴുവന്‍ ക്ഷേത്ര ജീവനക്കാരെയും മൂന്നു ദിവസത്തിനകം പരിശോധനയ്ക്ക് വിധേയമാക്കാന്‍ തീരുമാനിച്ചു. കൂടാതെ മാസത്തിലൊരിക്കല്‍ മുഴുവന്‍ ജീവനക്കാരെയും പരിശോധന നടത്തും. കഴിഞഞ മാര്‍ച്ചില്‍ കൊറോണയെ തുടര്‍ന്ന് കൊണ്ടുവന്ന നിയന്ത്രണങ്ങള്‍ പിന്‍വലിച്ച്‌ ക്ഷേത്ര നാലമ്ബലത്തിനകത്തേക്ക് ഭക്തരെ പ്രവേശിപ്പിച്ചു തുടങ്ങിയതിന് ശേഷമാണ് രോഗബാധ ക്രമാതീതമായി വര്‍ദ്ധിച്ചത്.